«Իմ քայլի» պատգամավոր, ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն այսօր խորհրդարանի լիագումար նիստում հայտարարեց. «Շատ մեծ փորձ ունեմ եւ Հոկտեմբերի 27-ի ողջ խորությունը ես լավ պատկերացնում եմ, հասկացել եմ: Հիմա՝ ի՞նչ եղավ այդ օրը: Երբ եղավ մեր հայտնի փեսայի ուղերձը՝ դեռ չհրապարակված փաստաթղթի մասին (ինքն ավելի շուտ իմացավ, եւ դա էլ է խնդիր՝ ազգային անվտանգության խնդիր), մեկ էլ՝ շատ պատրաստված «սառանչիների» խումբ…չասեմ՝ ով էր շենքում, ով չէր շենքում, բայց տպավորություն էր, որ այդ խումբն ուներ հանձնարարական՝ գտնել առաջին դեմքերին եւ սպանել: Ինչո՞ւ եմ ասում, որովհետեւ երբ Արարատ Միրզոյանին գնացի տեսա, անվտանգության տղաներն ասում էին՝ «Արարատն ընկած էր, մենք իրենց ասում էինք՝ ինքը մահացած ա, էլ մի խփեք, իրենք շարունակում էին խփել»…դա նման էր Վահե Ավետյանի սպանությանը: Երբ հրահանգ եղավ կոնկրետ ֆորսմաժոր ստեղծել՝ մարդկանց սպանելով: 27-ն էլ այդպես եղավ:
Եկեք թողենք, որ պետական, հատկապես՝ ուժային ինստիտուտներն ուշքի գան…Ոչ մի արյուն չպետք է թափվի, մենք մարտի 1 ենք տեսել: Բանակը չի կարող մասնակցել ներքաղաքական զարգացումներին: Բանակն էլ համարյա, որպես այդպիսին, չկա, բայց դրանք զինված մարդիկ են, մեծ քանակության զենք թափանցելու է ՀՀ: Ուժային կառույցները պետք է կարողանան լիկվիդացնել: Ոստիկանությունը, ԱԱԾ-ն, զինոստիկանությունը մեծ աշխատանք է անում, բայց ծավալն այնքան շատ է, որ ներթափանցելու են: Նույնիսկ մեր հնարավորությունները կարող են բավարար չլինել, որպեսզի չեզոքացնենք: Պետք է իրար օգնենք: Ապօրինի զենքը կրակելու է, իսկ ապօրինի զենքի հեռվից հրաման տվողներ, չկասկածեք, կան…Հայաստանի սահմանից դուրս են, ախպերությունն այնտեղ է դիրքավորված, բայց իրենց զորքը չկա, բա ո՞ւր կորան: Երբ քաղաքական արդեն պահանջներով միտինգները քաղաքական օրակարգում էին, այդ խմբավորումները չկային»:
Լուիզա ՍՈՒՔԻԱՍՅԱՆ
