Ձեր 1500 դոլարանոց շապիկը, որ երեկ հագել էիք, որտեղի՞ց էիք ձեռք բերել, պատգամավորի աշխատավարձո՞վ: Այսօր լրագրողները այսպիսի հարց ուղղեցին «Իմ քայլի» պատգամավոր Հայկ Սարգսյանին: Նա պատասխանեց. «Ես հիմա պատրաստ եմ այդ 1500 դոլարանոց մայկան 100 դոլարով հանձնել ձեզ: Նման ստով հասարակությանը փորձում եք տրամադրել: Բայց մեր հասարակությունը լավ գիտակցում է՝ ինչ է տեղի ունեցել»:
Լրագրողները խնդրեցին պարզաբանել, թե ինչո՞ւ էր գիշերով մի քանի մեքենայով գնացել Վարդան Աթաբեկյանի տուն: Նա պատասխանեց. «Մի քանի մեքենայով չէ, ես գնացել էի իմ մեքենայով, Հակոբ Սիմիդյանը եկել էր իր մեքենայով, մեր մյուս պատգամավորները, ովքեր մոտ հարաբերություններ ունեին, ջերմ, օրինակ, Երջանիկը Հակոբյան, եկել էր իր մեքենայով ու հասել ենք տան դիմաց, տպավորություն է ստեղծվել, որ…Ասե՞մ ես ինչի եմ գնացել, ես մտածել եմ, որ իմ ընկերոջը սպառնացել են: Ինքը հայրենասեր տղա է, թուրքահաճո որեւէ բան չէր կարող անել, ազգի դավաճանների օրակարգով շարժվեր, ես մտածել եմ, որ իմ ընկերոջը սպառնացել են»:
Հարցին՝ ի՞նչ կաներ ընդդիմադիր Հայկ Սարգսյանը, եթե Սերժ Սարգսյանը Արցախի հող հանձներ ու կապիտուլյացիայի նման համաձայնագիր ստորագրեր՝ Հայկ Սարգսյանը պատասխանեց. «Վերջին 20 տարին նախկին իշխանությունները բոլոր տեղերում պայմանավորվածություններ են ձեռք բերել դրսում, որ 7 տարածքները պետք է վերադարձվի: Իրենք 20 տարի շենքը կառուցել են ծուռ: Ինչ տեղի ունեցավ 2018-ին Նիկոլ Փաշինյանը եւ ժողովուրդը եկավ իշխանության՝ այ, հիմա հողերը հանձնելու են: Իրենք 20 տարի բերել են պրոցեսը նախապատրաստել են ու հասցրել այն փուլին, որ հողերը պետք է հանձնվեն: Նրանք բանակաշինությամբ չեն զբաղվել, հարցրեք՝ ինչ է տեղի ունեցել բանակում վերջին 2 տարվա ընթացքում, բոլոր կռված տղերքը ասում են, որ այս ընթացքում ինչ կռվել են, դա եղել է Նիկոլ Փաշինյանի բերած զենքը: Բայց ժառանգության վրա չի կարելի աչք փակել»:
Հռիփսիմե ՋԵԲԵՋՅԱՆ
