«Որեւէ մեկը չի ժխտում, որ կառավարող ուժն է կրում տեղի ունեցածի պատասխանատվությունը: Հետեւությունները կլինեն: Այս պատասխանատվությունն է նաեւ վարչապետին մղել ստորագրել այդ եռակողմ հայտարարությունը, որով 25-30 000 զինվորի կյանք է փրկվել: Նրանք դա գիտեն: Այդ հայտարարությամբ է նաեւ փրկվել Ստեփանակերտը, նաեւ՝ Արցախը»,-ԱԺ ամբիոնից այսօր հայտարարեց խորհրդարանի փոխնախագահ Լենա Նազարյանը:
Նա կրկին հիշեցրեց, որ հայտարարության ստորագրման օրը կառավարության շենք մտած անձինք ջարդուփշուր էին անում. «Անվտանգության աշխատակիցների հավաստմամբ՝ նրանց շարքում էր նաեւ «Բարգավաճ Հայաստան» խմբակցության պատգամավորներից մեկը: Ասե՞մ անունը՝ Դավիթ Մանուկյան»:
Կարդացեք նաև
Այս խոսքերից հետո դահլիճում կրքերը բորբոքվեցին: Լենա Նազարյանը, նկատի ունենալով ընդդիմադիրների՝ վարչապետի հրաժարականի պահանջը, շարունակեց. «Կառավարությունը ջարդուփշուր անելու պայմաններում հրաժարական պահանջելը հնարավոր չի»:
«Բարգավաճ Հայաստանի» պատգամավոր Նաիրա Զոհրաբյանը տեղից բղավեց, որ իրենց բոլոր պատգամավորների սենյակները վնասել են այդ օրը. «Չի՜ կարելի»:
Գեւորգ Պետրոսյանն էլ ասաց, որ Լենա Նազարյանի հայտարարությունը հանցագործության մասին հաղորդում է, եւ իրավապահները պետք է զբաղվեն: «Հենց այդպես էլ թող անեն»,-արձագանքեց Լենա Նազարյանը:
Հայտարարվեց ընդմիջում՝ մթնոլորտը հանդարտեցնելու համար: ԲՀԿ պատգամավոր Իվետա Տոնոյանը պնդեց, որ Լենա Նազարյանի հայտարարությունը ստահոդ է:
Լուիզա ՍՈՒՔԻԱՍՅԱՆ
