«Մեր խոսակցությունն այս ամբիոնից ՀՀ քաղաքացիների հետ է: Բոլոր նրանք, ովքեր կասկածում են ՀՀ քաղաքացիների լայնախոհության վրա, նրանք մոլորյալներ են: Ովքեր մտածում են, թե ժողովուրդը չի հասկանում, թե ինչ է եղել, մոլորյալներ են»,-ԱԺ լիագումար նիստում այսօր հայտարարեց «Իմ քայլի» պատգամավոր Վաղարշակ Հակոբյանը:
«Այս ամբիոնից հնչող նման հռետորաբանությունն անուղղակիորեն բախումների կոչեր են: ՀՀ-ում բախումներ չեն լինելու, իշխանությունն ունի այնքան կամք, ամրություն, որպեսզի սադրանքներին չտրվի»,-նկատի ունենալով ընդդիմադիր գործընկերների ելույթները՝ ասաց Վաղարշակ Հակոբյանը:
Նա դիմեց ընդդիմադիրներին. «Այն, ինչ դուք ուզում եք, իշխանություն է՝ պաշտոն: Եվ եթե խոսենք վայելքների և կոստյումների մասին, ապա կարծում եմ՝ գոնե դուք դրա մասին չպետք է խոսեք: Որեւէ մեկը չի խուսափելու պատասխանատվությունից եւ որեւէ մեկը չի տրվելու սադրանքներին: Սթափվեք: Այս երկրում չկա մեկը, ով այս կամ այն չափով չի առնչվել պատերազմին»:
Կարդացեք նաև
Հավելենք, որ այս ելույթին նախորդել էր այդ թվում «Բարգավաճ Հայաստանի» պատգամավոր Արման Աբովյանի ելույթը, որում նա հայտարարել էր. «Այս ծանր օրերին ոմանք ժողովրդի ցասումը ներկայացնում են որպես աթոռակռիվ: Իշխանությունը ոչ միայն «պադավատներ», քարտուղարուհիներ ու պարգեւավճար է, այլեւ պատասխանատվություն: Պետք է պատասխան տան նրանք, ովքեր երկուսուկես տարում իրավիճակը բերում էին այն դրության, որն այսօր ունենք»:
Հիշեցնենք, որ վարչապետ Նիկոլ Փաշինյանի, ՌԴ նախագահ Վլադիմիր Պուտինի եւ Ադրբեջանի նախագահ Իլհամ Ալիեւի ստորագրած փաստաթուղթը ենթադրում է Արցախի տարածքների վերադարձ Ադրբեջանին եւ ռուս խաղաղապահների տեղակայում:
Լուիզա ՍՈՒՔԻԱՍՅԱՆ
