Այսօր՝ ժամը 16:00-ին, նախատեսված էր ՀՀ ԱԺ խորհրդի նիստ: Նիստի օրակարգում ընդգրկված էր նաեւ ԲՀԿ խմբակցության ղեկավար Գագիկ Ծառուկյանի պատգամավորի լիազորությունների դադարեցման հարցը: Այդ մասին տեղեկացրել էր Գագիկ Ծառուկյանի խոսնակ, ԲՀԿ-ական պատգամավոր Իվետա Տոնոյանը: «Այլ կերպ ասած՝ իշխանությունները կյանքի գնով փորձում են Գագիկ Ծառուկյանին զրկել մանդատից»,- գրել էր Իվետա Տոնոյանը:
ԲՀԿ խմբակցության պատգամավոր Նաիրա Զոհրաբյանն Aravot.am-ի հետ զրույցում ասաց, որ ԱԺ խորհրդի ԲՀԿ-ական անդամները նիստին չեն մասնակցել: Իր տեղեկություններով քվորում չի եղել, նիստը չի կայացել: Խորհրդի անդամ, «Լուսավոր Հայաստան» կուսակցության ղեկավար Էդմոն Մարուքյանն էլ Aravot.am-ին փոխանցեց, որ ԼՀԿ-ի ներկայացուցիչները նույնպես նիստին չեն մասնակցել, որոշումներից էլ տեղյակ չեն:
ԱԺ կայքից տեղեկանում ենք, որ խորհրդի նիստ է տեղի ունեցել: Հաստատվել է վաղը կայանալիք հերթական նստաշրջանի օրակարգը. «Նոյեմբերի 17-ին գումարվող հերթական նիստերի օրակարգի նախագծում ընդգրկվել է 2 հարց:
«Ազգային ժողովի կանոնակարգ» սահմանադրական օրենքի 157-րդ հոդվածի 5-րդ մասի համաձայն՝ «Պատգամավորի լիազորությունները դադարեցնելու հարցով Սահմանադրական դատարան դիմելու մասին» ՀՀ ԱԺ խորհրդի որոշման նախագծի քննարկումը հետաձգվել է»:
Կարդացեք նաև
Հիշեցնենք, ԱԺ խորհրդում ընդգրկված է 18 անդամ՝ 6-ը ընդդիմադիր խմբակցություններից: Նիստին չի մասնակցել նաեւ ԱԺ նախագահ Արարատ Միրզոյանը: Նա դեռ ապաքինվում է:
Նելլի ԳՐԻԳՈՐՅԱՆ
