ԱԺ պատգամավոր Արմեն Խաչատրյանի հարցը վարչապետին մի փոքր դուրս էր ռազմաքաղաքական իրավիճակի համատեքստից: Բայց նա հարցի շահառուներին, որոնք ուժային կառույցների՝ ԱԱԾ, ոստիկանություն, ՊՆ, ՊԵԿ, հատկապես կրտսեր, միջին եւ ավագ խմբի ծառայողներն են, խոստացել է այն հնչեցնել: Ըստ պատգամավորի, մտահոգություն կա, որ պայմանավորված ֆինանսատնտեսական ծանր իրադրությամբ, իրենց հավելավճարները կարող են չտրվել, ինչը իրենք գնահատում են ոչ թե որպես հավելավճար, այլ՝ իրական աշխատանքի գնահատում, աշխատավարձ, որը տրվել է պարգեւավճարի տեսքով:
«Ես չեմ կարծում, թե էդպիսի պրոբլեմ կա: Ես առաջին անգամ եմ տենց բանի մասին լսում եւ չեմ կարծում, թե մենք էդպիսի սցենար քննարկում ենք, որ որեւէ մեկին որեւէ բան չվճարենք: Առավել եւս՝ ձեր ասած ծառայողներին: Ձեր ասածը ի գիտություն ընդունեցի եւ անպայման կդիտարկենք ու լուծումներ կտանք»,- պատասխանեց Նիկոլ Փաշինյանը:
Աշոտ ՀԱԿՈԲՅԱՆ
