«Երբ ասում էի՝ սեփական կետ, նկատի ունեի, որ մենք այդ տրամաբանությանը փորձելու ենք չհամաձայնել: Դա է այդ կետը»,-առցանց մամուլի ասուլիսում այսօր ասաց ՀՀ վարչապետ Նիկոլ Փաշինյանը՝ պատասխանելով «Արմենիա» հեռուստաընկերության հետեւյալ հարցին՝ «Ձեր պաշտոնավարման սկզբում ասացիք, որ բանակցությունները սկսում եք ձեր սեփական կետից: Ո՞րն է հիմա ձեր սեփական կետը բանակցություններում»:
Ավելի վաղ, արձագանքելով Aravot.am-ի հարցին՝ Փաշինյանը շեշտել էր, որ ցանկացել է փոխել «տարածքներ ոչնչի դիմաց» տրամաբանությունը:
Ինչ վերաբերում է նոր կետին՝ Նիկոլ Փաշինյանը նշեց. «Մենք պետք է վերլուծենք եւ ձեւավորենք այն օրակարգը, որն ունենք այսօրվա իրավիճակի շուրջ եւ պետք է սպասարկենք այդ օրակարգը, մասնավորապես՝ կենտրոնանալով Արցախի կարգավիճակի հարցի վրա: Ամենակարեւոր խնդիրը, որ ԼՂ ժողովուրդը պետք է ապրի ԼՂ-ում եւ ԼՂ կարգավիճակի հարցը մեր համար նոր սրությամբ եւ կարեւորությամբ պետք է դրվի բանակցային գործընթացի հիմքում, ինչպես նաեւ՝ հումանիտար, կոմունիկացիոն, տրանսպորտային հարցերը»:
Հիշեցնենք, որ վարչապետ Նիկոլ Փաշինյանի, ՌԴ նախագահ Վլադիմիր Պուտինի եւ Ադրբեջանի նախագահ Իլհամ Ալիեւի ստորագրած փաստաթուղթը ենթադրում է Արցախի տարածքների վերադարձ Ադրբեջանին եւ ռուս խաղաղապահների տեղակայում:
Կարդացեք նաև
Լուիզա ՍՈՒՔԻԱՍՅԱՆ
