«Եթե Ռուսաստանը զենք չտար, պատերազմը 7-րդ օրը կավարտվեր»,- այսօր Ազատության հրապարակում հանրահավաքի ժամանակ իր ելույթում ասաց ՀՀ նախկին վարչապետ, «Ազատություն» կուսակցության նախագահ Հրանտ Բագրատյանը:
Բագրատյանի խոսքով՝ օպերատիվ ռազմական իրավիճակը ճակատում այնպիսին էր, որ պետք է զինվորներին մտցնեինք խրամատների մեջ խորը, դա չի արվել, դրա ամբողջական պատասխանատվությունը կրում են Օնիկ Գասպարյանը եւ Արտակ Դավթյանը. «Ռազմատեխնիկական մյուս սխալները՝ հիանալի ստրատեգիական միջոցներ ունեինք, հակառակորդը գիտեր, որ ունեինք այն, ինչ ինքը չունի, միջուկային ատոմներ ընդհուպ, ոչինչ չի արվում»: Նա ասաց, որ չեն խփել նավթամուղներին, դիտմամբ են արել: Մեր զինվորների մեծ մասը թուրք չի տեսել, 80 տոկոսը բեկորներից է մահացել, իրանց վրա դրոններն են ընկել: Նիկոլ Փաշինյանն ասում է, որ մենք դասալիք ենք, ՊՆ նախարարը, որ պատերազմի ընթացքում զրոյական հատկություն ցույց տվեց, արդարանում է, ասում է՝ 5-րդ սերնդի զենք է եղել մեր դեմ, բա դուք ինչի՞ էիք AK առնում, որը հին զենք է: Որ ասում էին՝ ծանր մարտեր են գնում հարավային ուղղությամբ, հարավային ուղղությամբ առանձին ինտենսիվ մարտեր չեն եղել, մեր զինվորներին հնարավորություն չեն տվել կռվելու»:
Թե ինչ կարելի է անել արդեն ստորագրված փաստաթղթի հետ՝ Բագրատյանն ասաց, որ ինչ-որ բան կարելի է անել. «Նախ, մենք ինադ չպիտի ընկնենք ռուսների հետ, փորձը ցույց տվեց, որ ռուսների՝ մեզ կամեցածը շատ ավելի վատ է: ՌԴ-ն չի պատրաստվում մեր տեղը կռվել, մեր պատճառով պատերազմի մեջ մտնել Թուրքիայի կամ Ադրբեջանի հետ, սա պետք է հասկանանք: Երեկ ասվում էր, որ Դադիվանքը կպաշտպանեն: Եթե Քելբաջար չկա, Ղարաբաղ չի կարող լինել»:
Կարդացեք նաև
Ըստ Բագրատյանի, պետական հանցագործություն էր կապիտուլյացիայի նման փաստաթուղթ ստորագրելու, եթե արագ փոփոխություն չանենք, մեր կյանքը շատ է դժվարանալու:
Հռիփսիմե ՋԵԲԵՋՅԱՆ
