ԱԱԾ տնօրենի նախկին ժամանակավոր պաշտոնակատար, գնդապետ Միքայել Համբարձումյանն այսօր ուշագրավ հայտարարություն է արել։ Ի թիվս որոշ դիտարկումների, նա մի բացահայտում է արել՝ կապված վարչապետի ընդդիմախոսների հետ։
Պարոն Համբարձումյանն ասել է․ «Դիմելով Ձեզ, պարոն վարչապետ, ուզում եմ կրկնել այն, ինչ արդեն մեկ անգամ ուղիղ ասել եմ 27.10.2020թ. Վազգեն Մանուկյանի հայտարարության հետ կապված. թույլ եւ ոչ բավարար հիմքերով հարուցված քրեական գործերով չի կարելի քաղաքական ընդդիմախոսներին ձերբակալել, քաղաքական խնդիրները դրանով չեն լուծվում: Մարդկանց այդ միջոցներով հնարավոր չէ լռեցնել, ընդհակառակը` դրանից քաղաքական պայքարն ավելի է սրվում, քաղաքական դաշտում անջրպետն ավելի է խորանում, եւ հանրության շրջանում անարդարության զգացումն ավելի է մեծացնում իշխանության նկատմամբ անվստահությունն ու բացասական վերաբերմունքը»:
Թե ինչ քրեական գործի մասին է խոսքը եւ որ հոդվածով է այն նախատեսվում հարուցել, պարոն Համբարձումյանը ոչինչ չի ասում։
Aravot․am-ի հետ զրույցում ՀՀ նախկին վարչապետ Վազգեն Մանուկյանի կինը՝ Վարդուհի Իշխանյանն ասաց՝ տեղյակ չէ, թե ինչ քրեական գործի մասին է խոսքը։
«Քրեական գործ չի եղել։ Մեզ ոչ ոք չի դիմել, ոչ ոք մեր տուն չի եկել»,-ասաց տիկին Իշխանյանը։
Կարդացեք նաև
Նելլի ԲԱԲԱՅԱՆ
