Ադրբեջանական ռազմական ագրեսիայի հետեւանքով հարկադիր տեղահանված Հադրութի բնակիչներն այսօր բողոքի երթ իրականացրին նաեւ դեպի ՀՀ-ում Ռուսաստանի դեսպանատուն՝ բարձրաձայնելու, որ Նիկոլ Փաշինյանի, Իլհամ Ալիեւի եւ Վլադիմիր Պուտինի ստորագրած հայտարարությունը ենթադրում է, այդ թվում Հադրութի շրջանի հանձնում Ադրբեջանին, որ Արցախի բնակչությունը կորցրել է իր տունն ու իրավունքները:
Դեսպանատան առաջ նրանց ընդառաջ եկավ դեսպանության ներկայացուցիչը, ասաց, որ միայն կարող է բողոք-նամակն ընդունել եւ փոխանցել դեսպանին. «Մեկնաբանություններ տալ իրավասու չեմ»:
Հադրութցիները շեշտեցին՝ իրենք այլ վերաբերմունք էին ակնկալում ԵԱՀԿ Մինսկի խմբի համանախագահող Ռուսաստանից: Դեսպանատան ներկայացուցիչը, սակայն, կրկնեց, որ նամակը կվերցնի եւ կփոխանցի ղեկավարությանը:
«Առնվազն տարօրինակ է նման վերաբերմունքը, բայց մենք հանձնվող չենք»,-հայտարարեցին ցուցարարները:
Կարդացեք նաև
«Տրամադրված ենք նաեւ ԱԳ նախարարի հետ հանդիպելու: Մարտադաշտն իրենցն է կարծես, սակայն լուռ են»,-լրագրողների հետ զրույցում ասաց Մերի Դավթյանը:
Հիշեցնենք, որ հադրութցիներն այսօր առաջինը եղան Ֆրանսիայի դեսպանատան առաջ, որտեղ դեսպան Ջոնաթան Լաքոթը ոչ միայն դեսպանատան բակում ընդունեց եւ լսեց նրանց, այլեւ լրագրողների հետ զրույցում ուշագրավ գնահատականներ հնչեցրեց ստորագրված հայտարարության վերաբերյալ:
Լուիզա ՍՈՒՔԻԱՍՅԱՆ
