Ադրբեջանական ռազմական ագրեսիայի հետեւանքով հարկադիր տեղահանված Հադրութի բնակիչներն այսօր բողոքի երթ իրականացրին նաեւ դեպի ՀՀ-ում ԱՄՆ դեսպանատուն՝ բարձրաձայնելու, որ Նիկոլ Փաշինյանի, Իլհամ Ալիեւի եւ Վլադիմիր Պուտինի ստորագրած հայտարարությունը ենթադրում է, այդ թվում Հադրութի շրջանի հանձնում Ադրբեջանին, որ Արցախի բնակչությունը կորցրել է իր տունն ու իրավունքները: «Կորցրել ենք ամեն ինչ, բայց դեռ հույս ունենք, որ ԱՄՆ-ն կպահպանի ժողովրդավարության իր դեմքը: Վերադարձրեք Հադրութը, Հադրութն Արցախ է»,-հայտարարեց Հադրութի բնակիչ Մերի Դավթյանը:
Որպես բնակիչների ներկայացուցիչների՝ 3 հոգու ընդունեց ԱՄՆ դեսպանատան աշխատակիցը:
«Մենք ներկայացրինք մեր պահանջները: Դեսպանատան ներկայացուցիչը լսեց, ասաց, որ իրենց դեսպանը եւս շահագրգիռ է խնդրի հանգուցալուծմամբ եւ այս օրերին նախաձեռնելու է կլոր սեղան-քննարկում, որին կարող ենք նաեւ մենք մասնակցել: Իրենք տեղեկացված են պատերազմի հետեւանքին եւ խնդրին: Ասացին, որ կապ կհաստատեն մեր հետ եւ կհրավիրեն քննարկումների»,-լրագրողներին հայտնեց Մերի Դավթյանը:
Ռուսաստանի դեսպանատանը հադրութցիներին այսօր չընդունեցին:
Կարդացեք նաև
Ավելի վաղ նրանք եղան Ֆրանսիայի դեսպանատան առաջ, որտեղ դեսպան Լաքոթը ոչ միայն դեսպանատան բակում ընդունեց եւ լսեց նրանց, այլ լրագրողների հետ զրույցում ուշագրավ գնահատականներ հնչեցրեց ստորագրված հայտարարության վերաբերյալ:
Լուիզա ՍՈՒՔԻԱՍՅԱՆ
