Թուրքական խաղաղապահ առաքելություն Լեռնային Ղարաբաղի տարածք չի մեկնի: Այս մասին հայտարարել է Ռուսաստանի արտգործնախարար Սերգեյ Լավրովը այսօր միջազգային լրատվամիջոցներին տված հարցազրույցում:
«Թուրքիայի Հանրապետության որևէ խաղաղապահ ստորաբաժանում Լեռնային Ղարաբաղ չի մեկնի: Այդ մասին հստակ ասված է առաջնորդների հայտարարության մեջ»,- ասել է նա:
Լավրովի խոսքով՝ թուրք դիտորդների մոբիլության սահմանները կսահմանափակվեն Ադրբեջանում տեղակայվող ռուս-թուրքական կենտրոնով, որը կվերահսկի Լեռնային Ղարաբաղում հրադադարի պահպանման ռեժիմը:
«Թուրք դիտորդների մոբիլության սահմանները սահմանափակվում են այն աշխարհագրական կոորդինատներով, որոնք կսահմանվեն Ադրբեջանի տարածքում ստեղծվելիք ռուս-թուրքական մոնիթորինգի կենտրոնի տեղակայման համար. տարածքի այն հատվածի, որը մոտ չէ Ղարաբաղին, և որը լրացուցիչ կհստակեցվի»,- ասել է նա:
Կարդացեք նաև
Լավրովը նաև նշել է, որ առայժմ իրենք չեն նկատում Լեռնային Ղարաբաղում ձեռք բերված հրադադարի խախտման փորձեր:
«Առայժմ ես նշաններ չեմ տեսնում, որ ինչ-որ մեկը փորձում է խախտել այդ պայմանավորվածությունները»,- ասել է նա: Ըստ նախարարի՝ Մոսկվան համոզված է, որ բոլոր կողմերը շահագրգռված են Ղարաբաղում ռուս խաղաղապահների տեղակայմամբ:
Պատրաստեց՝ Վիկտորյա ԱՆԴՐԵԱՍՅԱՆԸ
