Քիչ առաջ ԱԱԾ-ից, որտեղ պահվում են նոյեմբերի 11-ին ընդդեմ կապիտուլյացիայի հանդես եկող ցույցի մասնակիցները, դուրս եկավ փաստաբան Տիգրան Աթանեսյանը:
Նա լրագրողների հետ զրույցում ասաց, որ հանդիպել է բերման ենթարկվածներից Էդուարդ Շարմազանովին, Իշխան Սաղաթելյանին, Սուրեն Սուրենյանցին եւ Դավիթ Համբարձումյանին, ում շահերն է ներկայացնում. «Ձերբակալում են մի հոդվածով, որի պատիժը մինչեւ երկու ամսով կալանքն է, այսինքն, չի կարելի մարդկանց կալանավորել: Այսինքն, մարդամեկի մոտ փսիխոզ է սկսել, որ իր կիրթ ընկերոջը հանձնի մեր հայրենիքը: Բոլոր ակտիվ քաղաքական գործիչներին ձերբակալում են, որպեսզի մարդիկ, որոնք փողոցում են, զրկի լիդերությունից, սա ակնհայտ է: Սա թուրք-ադրբեջանական քաղաքական հետապնդում է, որն իրականացնում է Նիկոլ Փաշինյանը՝ մեր ազգի դժբախտությունը»:
Աթանեսյանն ասաց, որ Դավիթ Համբարձումյանն անչափահաս երեխա ունի՝ 6 տարեկան, նրան ընդհանրապես իրավունք չունեն այդ հոդվածով ձերբակալել: Փաստաբանը բողոքարկելու է:
Հռիփսիմե ՋԵԲԵՋՅԱՆ
