Միջազգային լրատվամիջոցների էջերում կրկին Լեռնային Ղարաբաղն է: «Հայաստանը, Ադրբեջանը և Ռուսաստանը ստորագրեցին համաձայնագիր». կարդում ենք վերնագրերում:
Հայաստանի վարչապետ Նիկոլ Փաշինյանը գործարքն անվանել է «խիստ ցավոտ և՛ իմ, և՛ մեր ժողովրդի համար», գրում է BBC-ն: «Հրադադարի նոր պայմանագիրը զայրույթ է առաջ բերել Հայաստանում, ցուցարարները գրոհել են խորհրդարանը, ծեծի ենթարկել խոսնակին և կողոպտել վարչապետի գրասենյակը»,- հայտնում է BBC-ն:
«Անասելի ցավոտ համաձայնագրին» անդրադարձել է նաև CNN-ը՝ մեջբերելով վարչապետ Նիկոլ Փաշինյանի խոսքերը: Հեռուստաալիքը հիշեցրել է, որ երկուշաբթի ավելի վաղ Փաշինյանը պնդում էր, թե Շուշիի համար մարտերը շարունակվում են:
«Ալ-Ջազիրան» նկատում է, որ համաձայնագիրը ստորագրվել է մի քանի ժամ այն բանից հետո, երբ Լեռնային Ղարաբաղի պաշտոնյաները հաստատեցին, որ երկրորդ քաղաք Շուշին գրավվել է ադրբեջանական ուժերի կողմից:
Կարդացեք նաև
France-24-ը հայտնում է, որ «վիճելի շրջանը վերագրավելու նպատակով ադրբեջանական մի քանի հաղթանակներից հետո» Հայաստանն ու Ադրբեջանը Ռուսաստանի միջնորդությամբ համաձայնության են եկել՝ դադարեցնելու մարտերը Լեռնային Ղարաբաղում: Հեռուստաալիքը նաև հայտնում է, որ դժգոհ ցուցարարները ներխուժել են կառավարության շենք՝ կողոպտելով գրասենյակները և կոտրելով պատուհանները:
«Լեռնային Ղարաբաղում տեղակայվել են ռուս խաղաղապահներ Մոսկվայի միջնորդությամբ կնքված խաղաղության գործարքից հետո, որը Ադրբեջանում առաջ է բերել տոնակատարություններ, Հայաստանում՝ ցույցեր»,- գրում է բրիտանական The Guardian-ը:
Financial Times-ը հիշեցնում է, որ սեպտեմբերի 27-ին բռնկված պատերազմում Թուրքիան աջակցում էր Ադրբեջանին, մինչդեռ Ռուսաստանը, որը տարածաշրջանում գերիշխող աշխարհաքաղաքական ուժն է, չեզոքություն էր պահում, անգամ երբ Մոսկվայի միջնորդությամբ ձեռք բերված մի քանի հրադադարները տապալվեցին: «Պայմանագիրը, որը հաջորդեց ադրբեջանական ուժերի կողմից ռազմավարական վճռորոշ քաղաքի գրավմանը, խոշոր ռազմական հաղթանակ է Բաքվի համար, որն ամրապնդում է նրա մեծ տարածքային նվաճումները և հարցեր բարձրացնում Հայաստանի կողմից կառավարվող անկլավի ճակատագրի վերաբերյալ»,- գրում է թերթը:
Պատրաստեց՝ Վիկտորյա ԱՆԴՐԵԱՍՅԱՆԸ
