ԲՀԿ պատգամավորները գնացել էին Ռուսաստան՝ Ղարաբաղի հարցով հանդիպումների: Այսօր ԲՀԿ պատգամավոր Իվետա Տոնոյանից հետաքրքրվեցինք, թե ի՞նչ արդյունքներ եղան այդ հանդիպումներից: Նա պատասխանեց. «Հոկտեմբերի 29-ից նոյեմբերի 3-ն ընկած ժամանակահատվածում ԲՀԿ պատգամավորներ Վահե Էնֆիաջյանը, Միքայել Մելքումյանը եւ Նաիրա Զոհրաբյանը եղել են Մոսկվայում, ինչպես գիտեք, ավելի վաղ տեղի էր ունեցել ԲՀԿ քաղաքական խորհրդի նիստ, որտեղ Գագիկ Ծառուկյանի հանձնարարականով հրատապ այդ կազմակերպելու հանձնառություն էր իջեցվել: Այցի շրջանակների քննարկումների հետ կապված շատ չակերտներ այս պահին չեմ բացելու, սակայն այն, ինչ իրավասու եմ ձեզ փոխանցելու, կասեմ՝ այցի շրջանակներում բազմաթիվ հանդիպումներ են տեղի ունեցել իշխող «Եդինայա Ռոսիա» կուսակցության ղեկավար կազմի ինչպես նաեւ պետդումայում ներկայացված քաղաքական ուժերի ղեկավար կազմի ներկայացուցիչների հետ: Բնականաբար, քննարկումների առանցքում եղել են Արցախի շուրջ ծավալվող իրադարձությունները»:
Տոնոյանն ասաց, որ ստեղծված իրավիճակում անհրաժեշտ է օր առաջ վերականգնել մեր ռազմավարական գործընկերոջ՝ Ռուսաստանի հետ լիարժեք հարաբերությունները:
Մեր հարցին՝ հայտնի է, որ ՀԱՊԿ-ին դիմելու հետ կապված հայկական կողմը որոշակի կաշկանդվածություն ուներ, քանի որ վստահ չենք, որ ՀԱՊԿ անդամ բոլոր երկրները կողմ կլինեն քայլեր ձեռնարկել՝ ՀՀ անվտանգությունը պահելու համար, ինչ Գագիկ Ծառուկյանի խափանման միջոցը փոխվել է, նա կապ հաստատե՞լ է իր ընկեր Լուկաշենկոյի հետ ու քննարկե՞լ է Արցախի հարցը՝ Տոնոյանը պատասխանեց. «Ես պարոն Ծառուկյանի առանձին նախաձեռնություններին չեմ անդրադառնալու այս պահին: Կարող եմ ասել, որ պարոն Ծառուկյանը ամենօրյա ռեժիմով կապի մեջ է թե՛ Ռուսաստանի գործընկերների, թե՛ Եվրոպայի գործընկերների հետ, ինչպես նաեւ այլ գործընկերների հետ եւ բոլոր հեռախոսազրույցների հիմքում բնականաբար ընկած է անհանգստությունը եւ մտահոգությունը Արցախում տիրող իրավիճակով պայմանավորված»:
Մենք նաեւ հետաքրքրվեցինք, թե ինչպես է վերաբերվում այս օրերին կանանց ջոկատների կազմավորմանը եւ ԲՀԿ-ի կանայք արդյոք առաջնագիծ գնո՞ւմ են, ներգրավվածություն ունե՞ն՝ Տոնոյանը պատասխանեց, որ ԲՀԿ-ի կանայք ահռելի ծավալով աշխատանքներ են իրականացնում թիկունքում. «Յուրաքանչյուր ոք ինքն է նպատակահարմար գտնում, թե ինչպես պետք է հայրենիքին օգտակար լինել: Եթե ոմանք կարծում են, որ դա սահմանին կռիվ տալով է՝ դա իրենց իրավունքն է, բայց ես կարծում եմ, որ ենք այստեղ՝ թիկունքում շատ մեծ անելիք ունենք, որն անում ենք»:
Կարդացեք նաև
Հռիփսիմե ՋԵԲԵՋՅԱՆ
