Ռուսաստանի և Թուրքիայի նախագահներ Վլադիմիր Պուտինն ու Թայիփ Էրդողանն իսկապես քննարկել են Լեռնային Ղարաբաղի թեման, ասել է ՌԴ նախագահի խոսնակ Դմիտրի Պեսկովը՝ անդրադառնալով Ղարաբաղի հարցով աշխատանքային խումբ ստեղծելու վերաբերյալ Թուրքիայի առաջարկի մասին լուրերին։
«Շաբաթ օրը մենք հայտնել ենք հեռախոսազրույցի ընթացքում արծարծված թեմաների մասին։ Դրան ավելացնելու ոչինչ չունեմ։ Ղարաբաղի թեման իսկապես բարձրացվել է»,- ասել է Պեսկովը՝ մեկնաբանելով այն հարցը, թե ինչպես է ռուսական կողմը վերաբերում ղարաբաղյան խնդրի լուծման հարցով աշխատանքային խումբ ստեղծելու թուրքական առաջարկին։
Ավելի վաղ CNN Turk-ը, վկայակոչելով իր դիվանագիտական աղբյուրները, գրել էր, թե Թուրքիայի նախագահ Ռեջեփ Թայիփ Էրդողանն իր ռուս գործընկեր Վլադիմիր Պուտինին առաջարկել է ղարաբաղյան խնդրի լուծման հարցով աշխատանքային խումբ ստեղծել։
Թուրքական հեռուստաալիքը հաղորդում է, որ Պուտինը ողջունել է Էրդողանի առաջարկը և արդեն առաջիկա օրերին Ղարաբաղի հարցով բանակցությունները կարող են անցնել երկկողմ ձևաչափի, որը գործելու է ԵԱՀԿ Մինսկի խմբից անջատ։ Նշվում է, որ խումբն աշխատելու է հրադադարից հետո և նպատակ է ունենալու հասնել գործընթացի քաղաքական կարգավորմանը։
Կարդացեք նաև
Պատրաստեց ՎԻԿՏՈՐՅԱ ԱՆԴՐԵԱՍՅԱՆԸ
