«Այո, ժողովրդագրական ծրագրերի կարեւորությունը մեծանում է, բայց ես պետք է ասեմ, որ 2020թ. սկսված ծրագրերով, ըստ հոկտեմբերի տվյալների, դրանք եւ շահառուների նախատեսված քանակը դեռ չի լրացել»,-ԱԺ մշտական հանձնաժողովների համատեղ նիստում այսօր 2021թ.-ի պետբյուջեի նախագծի քննարկման ժամանակ ասաց ՀՀ աշխատանքի եւ սոցիալական հարցերի նախարար Զարուհի Բաթոյանը:
«Լուսավոր Հայաստանի» պատգամավոր Սրբուհի Գրիգորյանը հետաքրքրվել էր, թե պատերազմական իրավիճակով պայմանավորված՝ ժողովրդագրական վիճակին ուղղված նոր ծրագրեր կա՞ն: «Բյուջեով ավելի է նախատեսված, քան իրականացվել է: Իմ գնահատմամբ՝ դեռ ունենք բավականին ծրագրեր, բայց շահառուների դիմումները քիչ են: Իհարկե, ծրագրերը կվերանայվեն եւ կքննարկվեն: Այն առաջարկները, որոնք կարծում եք, որ կարեւոր են, ուրախ կլինեմ քննարկելու»,-նշեց նախարարը:
Գրիգորյանը հստակեցրեց հարցը՝ ժողովրդագրական ծրագրերի հետ կապված ի՞նչ տեսլական ունեք: «Դրանք միայն սոցիալական ոլորտին չեն վերաբերում: Ունենք ծննդյան միանվագ գումարի ավելացում, խնամքի նպաստ, բնակարանի ապահովում: Վերջինս ամենամեծ խոչընդոտն էր երիտասարդ ընտանիքների դեպքում: Ուստի գործում է հանձնաժողով, որը միջգերատեսչական գործակցության նպատակ ունի: Առողջապահության ոլորտում էլ կան նման ծրագրեր: Կարեւոր է նաեւ երեխայի խնամքի ոլորտը՝ մանկապարտեզներ, նախակրթարաններ, ուստի միայն մեկ ոլորտում ծրագրերի ավելացմամբ չենք կարող հարցը լուծել: Քննարկումները շարունակվում են, եւ ծրագրերը կվերանայվեն այս տրամաբանությամբ»,-պատասխանեց Զարուհի Բաթոյանը:
«Իմ քայլի» պատգամավոր Հերիքնազ Տիգրանյանը նկատեց. «Ձեր նախարարության շահառուների առնչությամբ զինծառայողների հետ կապված շփոթություն կա»:
Կարդացեք նաև
Տիգրանյանը նաեւ կարծում է, որ հաշմանդամություն ունեցողների առնչությամբ բյուջեում ծախսերի վերանայում անհրաժեշտ կլինի: Բաթոյանն այս առիթով անդրադարձավ հաշմանդամություն ունեցող անձանց աջակցող միջոցներին. «Պատերազմի սկսվելու առաջին օրերից այս մասին մտածել ենք, քննարկել, որ հատկապես բյուջեում դա նկատի ունենանք: Մեր քննարկումները ցույց են տվել, որ մենք այս պահի դրությամբ բյուջեի իմաստով որեւէ խնդիր չունենք, որովհետեւ որոշակի աջակցող տեսակների դեպքում նախորդ տարի ունեցել ենք վերաբաշխումներ, իսկ 2021թ.-ի դեպքում բյուջեում դա ավելի ճկուն կերպով ենք արտացոլել, որպեսզի աջակցող տեսակների, մասնավորապես՝ զինծառայողների պրոթեզավորման խնդիր չունենանք: Զինծառայողների դեպքում պրոթեզներն այլ են, տարբերվում են: Համենայն դեպս, մեր տվյալներով՝ այս պահին խնդիր չունենք: Անգամ եթե կարիք առաջանա, դժվարություն չկա ծրագրերը վերանայելու»:
Զարուհի Բաթոյանը նաեւ հայտնեց, որ քննարկման փուլում է պատերազմից տուժած անձանց սոցիալ-հոգեբանական վերականգնողական ծրագիրը, որը ոչ միայն կարճաժամկետ աջակցություն է ենթադրում, այլեւ ոլորտային երկարաժամկետ ծրագրեր, այդ թվում՝ պրոթեզաօրթոպեդիկ եւ վերականգնողական ծառայությունների առումով:
Լուիզա ՍՈՒՔԻԱՍՅԱՆ
