Ադրբեջանաթուրքական հրթիռակոծության հետեւանքով ամենաշատը տուժել են Շուշիի մշակութային օջախները: Այսօր այս մասին «Արմենպրեսի» մամուլի սրահում ասաց Արցախի կրթության, գիտության եւ մշակույթի նախարար Լուսինե Ղարախանյանը:
Նրա խոսքով, արդեն իսկ Սփյուռքի մեր հայրենակիցներից բազմաթիվ զանգեր է ստացել, որոնք պատրաստակամություն են հայտնել դրանք վերականգնել՝ այդ թվում Շուշիի Ղազանչեցոց եկեղեցու գմբեթը. «Ես հավատում եմ մեր ապագային, հավատում եմ՝ անելու ենք այն, ինչ նախատեսել ենք, մենք ատելություն չենք սերմանում ի հակակշիռ թշնամու, որը սերունդներին պարբերաբար ատելություն է սերմանում եւ թույլ չի տալիս իր սերունդը մտածի ազատ: Ի տարբերություն թշնամու, մենք ապագան խաղաղ կերտել ենք սովորեցնում եւ կսովորեցնենք»:
Արցախի ԿԳՄ նախարարն ասաց, որ ծրագրեր ունեն Հադրութի Տող գյուղում բացել ինժեներական տեխնոպարկ եւ ինչ ծրագրել են՝ անելու են:
Տիկին Ղարախանյանն ասաց, որ դիմել է ՄԱԿ-ի կրթության հարցերով գլխավոր պատասխանատուին եւ ներկայացրել իրավիճակը, կրթության իրացման անհնարինությունը եւ խնդրել, որ իր մանդատի շրջանակներում եւ ՄԱԿ-ի սկզբունքներին ու նպատակներին համապատասխան օգնի վերականգնելու 30 հազար երեխայի, ուսանողի կրթության իրավունքը, բայց՝ ձայն բարբառոյ յանապատի. «Ես միջազգային ոչ մի կառույցի վրա հույս չեմ դնում, իմ հույսը առաջնագծում կանգնած զինվորն է եւ ես հավատում եմ նրան»:
Կարդացեք նաև
Լուսինե ԲՈՒԴԱՂՅԱՆ
