«Ժամանակին կառավարության սահմանած ժամանակացույցը ամեն տարի նախատեսում էր Սեւանի մակարդակը բարձրացնել: Կարողանո՞ւմ ենք ամեն տարի դա իրականացնել: Եթե այո, անտառածածկ հատվածները ժամանակին մաքրվո՞ւմ են: Խնդիր կար, որ Սեւանը բարձրանում էր, եւ չէին կարողանում մաքրել»,-ԱԺ մշտական հանձնաժողովների նիստերում այսօր 2021թ. պետբյուջեի նախագծի քննարկման ժամանակ ՀՀ շրջակա միջավայրի փոխնախարար Իրինա Ղափլանյանից հետաքրքրվեց «Լուսավոր Հայաստանի» պատգամավոր Արկադի Խաչատրյանը:
Փոխնախարարը նախ փաստեց, որ լճի ջրի մակարդակի բարձրացման հարցն ամրագրված է մի շարք օրենքներում, որպեսզի կարողանանք էկոհամակարգը պահպանել:
«Վերջին երկու տարում հաջողվեց թվով եւ ծավալով ամենաքիչ բացթողումներն ունենալ: Բացթողումները կախված են ջրային ռեսուրսների ոչ արդյունավետ կառավարման հետ: Այսինքն, ոչ միայն լճի էկոհամակարգի պահպանման խնդիրը պետք է լուծենք, այլեւ ջրային ռեսուրսների պահպանման»,-նշեց Իրինա Ղափլանյանը:
Պատգամավորը հարցրեց՝ ափամերձ հատվածների մաքրման առնչությամբ ինչպիսի՞ իրավիճակ է: Փոխնախարարը համաձայնեց, որ դա լուրջ խնդիր է եղել, որովհետեւ նախկինում անտառածածկ հատվածները պատշաճ չեն մաքրվել. «Քրեական գործեր կան հարուցված, որոնք հիմա ընթացքի մեջ են: Սահմանված ծավալի հատվածները չմաքրելը կապված էր նաեւ մեթոդաբանական խնդրի հետ: Դեռ շատ աշխատանք պետք է արվի, եւ այս տարվա կատարողականը նշյալ պատճառով թերի էր»:
Կարդացեք նաև
Ղափլանյանի խոսքով՝ լճի ափամերձ ենթակառուցվածքների առկայությունը եւս խնդիր է. «Գավառ-Մարտունի հատվածում մի քանի մետր է մնում, որ ջուրը մոտենա մայրուղուն: Մի քանի տարբերակ է դիտարկվում, որոշ հետազոտություններ պետք է իրականացվեն: ԵՄ-ի հաստատած դրամաշնորհով որոշ միջոցառումներ կիրականացվեն՝ էկոհամակարգի պահպանման համար, այդ թվում՝ կարեւոր հետազոտություններ եւ քաղաքականության մշակում ենթակառուցվածքների առնչությամբ: Ճանապարհները գուցե պատսպարվեն, գուցե այլընտրանքային տարբերակներ նախագծվեն»:
Լուիզա ՍՈՒՔԻԱՍՅԱՆ
