Ռուսաստանի համար անհասկանալի է Լեռնային Ղարաբաղում կռվող օտարերկրյա վարձկանների մասին արտգործնախարար Սերգեյ Լավրովի հայտարարությանը հաջորդած՝ Ադրբեջանի նախագահ Իլհամ Ալիեւի հուզական արձագանքը։ Այդ մասին ՏԱՍՍ-ին հայտնել են Ռուսաստանի արտաքին գործերի նախարարությունում աղբյուրները:
«Ճիշտն ասած, մենք այնքան էլ լավ չենք հասկանում հարգարժան Իլհամ Հեյդարովիչ Ալիեւի հուզական արձագանքը Սերգեյ Վիկտորովիչ Լավրովի մեկնաբանությանը։ Միգուցե Ադրբեջանի նախագահի օգնականները նրան ցույց են տվել ուրիշի նյութերը կամ ներկայացրել են իրենց սեփական մեկնաբանությունը», – ասել է գործակալության զրուցակիցը:
Աղբյուրը հիշեցրել է նոյեմբերի 3-ին «Կոմերսանտ» թերթին տված հարցազրույցից Լավրովի մեջբերումը. «Մենք, իհարկե, մտահոգված ենք հակամարտության միջազգայնացման և Մերձավոր Արևելքից զինյալների ներգրավմամբ: Մենք բազմիցս կոչ ենք արել արտաքին խաղացողներին օգտագործել իրենց հնարավորությունները՝ կանխելու վարձկանների տեղափոխումը։ Ըստ առկա տվյալների, հակամարտության գոտում գտնվող վարձկանների թիվն արդեն մոտենում է երկու հազարի: Այս թեման, մասնավորապես, բարձրացրել է Ռուսաստանի Դաշնության նախագահ Վլադիմիր Պուտինը հոկտեմբերի 27-ին Թուրքիայի նախագահ Ռեջեփ Թայիփ Էրդողանի հետ հեռախոսազրույցի ընթացքում և Ադրբեջանի ու Հայաստանի ղեկավարների հետ կանոնավոր շփումների ժամանակ»։
«Ինչպես տեսնում եք, մեկնաբանություններում ոչ մի նախատինք չկա ո՛չ Ադրբեջանի, ո՛չ էլ որևէ այլ երկրի հասցեին», – հավելել է ՏԱՍՍ-ի զրուցակիցը: «Սա վերաբերում է վարձկան գրոհայինների՝ Ռուսաստանի անմիջական հարևանությամբ գտնվող Անդրկովկասյան տարածաշրջան ներթափանցման վերաբերյալ մեր ծայրաստիճան մտահոգությանը։ Մեր ադրբեջանցի ընկերները պետք է ավելի ուշադիր լինեն առաջնային աղբյուրներին ծանոթանալիս»:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
