«Մի բան կարող եմ միայն նշել՝ «ահաբեկիչ» հասկացությունը: Կազմակերպություն կա, որն ընդունում է ահաբեկչական լինելը, օրինակ՝ ՄԱԿ-ը: Բայց բոլորին չէ, որ ընդունում են որպես ահաբեկչական: Կան կազմակերպություններ, որոնց մի մասն ահաբեկչական են համարվում, մյուսը՝ ոչ»,-ԱԺ տարածաշրջանային եւ եվրասիական ինտեգրման հարցերի եւ ֆինանսավարկային ու բյուջետային հարցերի հանձնաժողովների նիստում 2021թ. պետբյուջեի նախագծի քննարկման ժամանակ այսօր անդրադառնալով հարցին, թե արդյոք քննարկվո՞ւմ է տարածաշրջանում հակաահաբեկչական կոալիցիա ստեղծելու հարցը՝ ասաց ՀՀ ԱԳ փոխնախարար Շավարշ Քոչարյանը:
«Նայեք ինչ է կատարվում Սիրիայում: Այն ահաբեկչական կազմակերպությունները, որոնց սատարում է Թուրքիան, դրանց չի համարում ահաբեկչական, հակառակը՝ «պայքարում» են բռնապետական ռեժիմի դեմ: Այսինքն, ունենք խնդիր «ահաբեկիչ» եւ «ահաբեկչական կազմակերպություն» հասկացությունների հետ»,-նշեց Քոչարյանը:
Նա հավելեց. «Ընդհանուր դատողություն անեմ: Եթե խորքային նայեք պատմական վերջին իրադարձություններին, դրանք մեկ հիմք ունեն՝ ինքնաբավ քաղաքակրթությունների դեմ հակաքաղաքակրթական ուժերի պայքարը: Հայոց ցեղասպանությունը, Մերձավոր Արեւելքում կատարվողը դրանց շարքին են դասվում»,-շեշտեց Շավարշ Քոչարյանը: Որպես օրինակ նա մատնանշեց, որ հակաքաղաքակրթական ուժերի համար արժեքները նշանակություն չունեն. «Իսլամիստները մահմեդականների հանդեպ այնպիսի վայրագություններ են անում…Կարծում եմ՝ ավելի խորքային պետք է նայենք ձեր տված հարցին»:
Շավարշ Քոչարյանի խոսքով՝ հայկական կողմի բոլոր մոտիկ եւ հեռու դաշնակիցները կայացած քաղաքակրթություն ունեն՝ Եվրոպա, Վրաստան, Իրան, Ռուսաստան, եւ այդ փաստը հակադրվում է Թուրքիային եւ Ադրբեջանին. «Կայացած են այն ժողովուրդները, որոնք այլ ժողովրդի հոգեւոր-մշակութային արժեքների հանդեպ հավակնություններ չունեն: Իսկ չկայացածներն իրենց են վերագրում ուրիշների արժեքները»:
Կարդացեք նաև
Լուիզա ՍՈՒՔԻԱՍՅԱՆ
