«Այո, այսօր հայ ժողովուրդն Արցախում փաստացի երեք թշնամու դեմ է պայքարում՝ Թուրքիայի, միջազգային ահաբեկիչ-զինյալների եւ Ադրբեջանի: Ահաբեկիչ-զինյալների հայտնվելը մեր տարածաշրջանում ավելի քան մարտահրավեր է ոչ միայն մեր համար, այլեւ ավելի լայն համատեքստում»,-ԱԺ արտաքին հարաբերությունների, ֆինանսավարկային եւ բյուջետային հարցերի հանձնաժողովների նիստում 2021թ. պետբյուջեի նախագծի քննարկման ժամանակ այսօր անդրադառնալով արցախյան պատերազմում հակառակորդների կողմից ահաբեկչական տարրերի ներմուծմանը՝ ասաց ՀՀ ԱԳ նախարար Զոհրաբ Մնացականյանը:
«Դրա բուն հետեւանքներն իրապես լուրջ են: Չգիտեմ՝ ինչո՞վ էին մտածում Բաքվում, երբ զինյալներին ներքաշում էին այս պատերազմում, որովհետեւ դա ողջ տարածաշրջանի համար է վտանգ: Սա նոր իրողություն է մեր տարածաշրջանում, որն ի հայտ է բերում գերակայությունների նոր շրջանակ: Ահաբեկչության դեմ պայքարը տարածաշրջանային առումով նոր նպատակներ ունի: Միջազգային գործակցության շրջանակում մենք ներգրավված ենք, բայց սեպտեմբերի 27-ից սկսած՝ իրավիճակն անմիջապես մեր տարածաշրջանին է վերաբերում»,-նշեց նախարարը:
«Իմ քայլի» պատգամավոր Արտակ Մանուկյանը հետաքրքրվեց՝ քանի որ Ֆրանսիան թուրքական «Գորշ քայլեր» կազմակերպությունը ճանաչել է որպես ահաբեկչական, հնարավո՞ր է՝ ՀՀ-ն էլ նման քայլ անի: Զոհրաբ Մնացականյանը պատասխանեց. «Դուք նշեցիք մեկ խմբավորում, բայց մեր կարեւոր գործառույթն է՝ իրողության դեմ պայքարում տարածաշրջանում ավելի համալրված եւ թիրախային աշխատել: Հասկանում ենք, որ վտանգը շատ ավելի է տարածվելու: Այն վտանգ է շատ երկրների համար: Պայքարելով մարտի դաշտում դրա դեմ՝ կարիք ենք ունենալու ավելի հիմնավոր կարողությունների՝ դրա դեմ նաեւ քաղաքական հարթակում պայքարելու համար: Մոտ ժամանակներս ավելի կոնկրետ կխոսենք ձեր տված հարցի մասին»:
Կարդացեք նաև
Լուիզա ՍՈՒՔԻԱՍՅԱՆ
