Այս լուսանկարն արվել է Գորիսից դեպի Կովսական տանող արահետներից մեկում։ Կամավորը, որը տրամադրել է լուսանկարը՝ խնդրեց չնշել անունը, քանի որ հարազատները տեղյակ չեն, որ նա առաջնագծում է։ Կամավորին զարմացրել էր այն, որ շուրջբոլորը չոր խոտեր ու տերեւաթափ ծառեր են, իսկ այս ծաղիկը ծաղկել է։
Քիմիկոս–մանկավարժ, բնապահպան Վարդուհի Օհանջանյանի խոսքով՝ սա գնարբուկազգիների ընտանիքին պատկանող գնարբուկ Վորոնովին է։ Աճում է ներքին եւ միջին լեռնային գոտիներում, մասնավորապես, Զանգեզուրի անտառներում եւ Շիկահողի արգելանոցում։ Գնարբուկ Վորոնովին գրանցված է ՀՀ Կարմիր գրքում։ Ծաղկում է ապրիլ–մայիս ամիսներին, պտղաբերում մայիս–հունիսին։
Տիկին Օհանջանյանի խոսքով, գուցե այս սեզոնին ծաղկելը խորհրդանշական նշանակությո՞ւն ունի եւ փաստում է մոտալուտ մեր հաղթանակի մասին, քանի որ հենց սահմանին է ծաղկել։
«Հողի եւ շրջակա միջավայրի ջերմաստիճանի բարձրացումը հանգեցնում է սեզոնային անոմալ երեւույթների, այսինքն` տվյալ տարածքում արձանագրվող կրակոցները ու պայթյունները եւս նպաստում են բնության փոփոխությունների»,–նշեց Վ․ Օհանջանյանը։
Ի դեպ, ՄԱԿ–ի որոշմամբ, վաղը՝ նոյեմբերի 6–ին, աշխարհում նշվում է պատերազմի եւ զինված հակամարտության ժամանակ շրջակա միջավայրի չարաշահումը կանխարգելելու միջազգային օրը։
Կարդացեք նաև
Արմեն ԴԱՎԹՅԱՆ
