Արցախի դեմ սանձազերծված ադրբեջանաթուրքական ագրեսիայից զոհվել է Շիրակի մարզի Մեծ Սեպասար համայնքի բնակիչ, 29-ամյա Ջիվան Գրիգորյանը։ Նա մի քանի տարի է՝ ծառայության էր անցել Ազգային անվտանգության խաղաղապահ զորքերում ու պատերազմի առաջին իսկ օրվանից առաջնագծում էր։
Նրա քեռու դուստրը՝ Անի Մարտիրոսյանն Aravot.am-ին պատմեց, որ Ջիվանը որոշել էր տուն չվերադառնալ մինչև հաղթանակը՝ պատերազմի ավարտը։
«Հերթափոխի ժամանակն է եղել, նրան տուն են ուղարկել, սակայն իր ընկերոջ հետ որոշել են տուն չվերադառնալ, նորից բարձրանալ դիրքեր՝ մինչև կռիվը չվերջանա։ Հենց դիրքեր բարձրանալիս էլ թշնամին ռմբակոծել էր այն մեքենան, որի մեջ եղել է նաև Ջիվանը։ Մի քանի օր առաջ էլ թշնամին ռմբակոծել էր իրենց դիրքերը, տնեցիներին զանգել, ասել է՝ ես ողջ եմ, մատաղ արեք»։
Ջիվանը սովորել է Շիրակի պետական համալսարանի ֆիզկուլտուրայի բաժնում, մի պահ գնացել է արտագնա աշխատանքի, հետո որոշել, որ պիտի հայրենիքում անցնի մշտական ծառայության։ Նա տան միակ արու զավակն էր, ամուսնացած չէր, ունի մեկ քույր։
Կարդացեք նաև
Անի Մարտիրոսյանն ասաց, որ Ջիվանն էր պահում ընտանիքը, հայրը մի ժամանակ արտագնա աշխատանքի էր մեկնում, բայց համավարակի տարածման ընթացքում այլևս անհնար էր։
«Այնքան հասնող էր, օգնող, բերանդ չբացեիր, հասնում էր․․․ Մի աղջկա էր հավանել հարևան գյուղից, ասաց՝ բարձրանամ դիրքեր, գամ, գնալու եմ անպայման տեսնեմ, ամուսնանամ»-պատմեց Անի Մարտիրոսյանը:
Նունե ԱՐԵՎՇԱՏՅԱՆ
