Քննչական կոմիտեի նախագահի պաշտոնակատար Արթուր Մելիքյանն այսօր ԱԺ-ում լրագրողների հետ զրույցում հայտնեց, որ մոտ 180 քննիչներ կամավորագրվել են՝ առաջնագիծ մեկնելու համար, մի վաշտն էլ այս շաբաթ կմեկնի:
Վարձկան ահաբեկիչները տեսանյութերում տեղեկություններ են հայտնում, թե ով է իրենց հավաքագրել, ով է ուղարկել եւ այլն, ուստի լրագրողները Մելիքյանին հարցրեցին՝ այլ երկրներում աշխատանք տարվո՞ւմ է՝ տվյալ անձանց հայտնաբերելու ուղղությամբ, դիմումներ ուղարկե՞լ եք այլ երկրներին՝ նա պատասխանեց. «Այս պահին ԱԱԾ-ի հետ ենք սերտ ու համագործակցված աշխատում, գիտեք, որ ԱԱԾ-ի խողովակներն ավելի ընդլայնված են այդ առումով: Իհարկե, աշխատում ենք, բայց հիմիկվա դրությամբ դեռ այլ պետությունների հետ չենք աշխատում: Նախատեսում ենք»:
Արթուր Մելիքյանն ասաց, որ այն անունները, որոնք հնչել են, այդ անձանց ինքնությունները պարզելուց, ապացույցներ հավաքագրելուց հետո միանշանակ ներգրավելու են գործով՝ անկախ նրանից՝ ՀՀ-ում կլինե՞ն, թե՞ ոչ. «Վարձկանները ռազմագերու կարգավիճակից չեն օգտվում, որեւէ միջազգային փաստաթուղթ չկա, նրանք նույն հանցագործներն են՝ ավելի մեծ մասշտաբի»:
Ինչ վերաբերում է ներքին դավաճանություններին՝ Մելիքյանն ասաց, որ ՔԿ վարույթում դրանց հետ կապված գործ չկա, ԱԱԾ տնօրենի տեղակալի հայտարարություններից են տեղեկացել. «Դասալքության հետ կապված կան որոշակի խնդիրներ, բայց որ ասեմ այնպես մասշտաբային ու ահագնացող է, որ բանակը կազմալուծվելու է դրանից, ընդ որում, բանակի մասին չի խոսքը, ավելի շատ պահեստազորի»:
Կարդացեք նաև
Հարցին՝ ՔԿ վարույթում կա՞ն գործեր՝ Արցախից ապօրինի զենք բերելու հետ կապված՝ պարոն Մելիքյանը պատասխանեց. «Իհարկե, կան, երեկվա դրությամբ 8-9 քրեական գործ կար: Նպատակային չէր ստորաբաժանումներից բերել, կենտրոնացնել, Սյունիքի վարույթում կա: 9 քրգործ կա: Որպես կանոն, խնդիրը պահեստազորայինների հետ է»:
Թե ի՞նչ նպատակով են նման քայլի դիմում՝ ՔԿ ղեկավարն ասաց. «Որեւէ լուրջ պատճառաբանություն չկա: Ինքներդ էլ հասկանում եք, ինչի՞ համար պետք է բերել նռնակը, կամ ինքնաձիգը, ինքնաձիգի փամփուշտը, քաղաքացիական կյանքում ինչի՞ն է պետք: Համենայնդեպս, նշեմ, որ պետք է հաշվեհարդար լինենք այսինչի հետ, այնինչի հետ՝ չկա այդպիսի դեպք»:
Հարցին՝ հնարավո՞ր է դա երկրում ուզում են քրեական ենթամշակույթին ծառայեցնել՝ Արթուր Մելիքյանը պատասխանեց. «Եթե ընդունենք՝ փախուստ է, չի ուզում ծառայի, ինքը կարող է, չէ՞ զենքը հանձնել իր համածառայակիցներին, իր հրամանատարին, ցանկացած ռազմական ոստիկանության կետի: Ընդունենք, դիրքից հետ վերադարձավ, ճանապարհին հազար հատ իրավապահ մարմիններ կան, կարող էր մոտենալ, զենքը հանձնել, ինչի՞ պիտի մեքենան բերես հասցնես Երեւան»:
Ուստի Մելիքյանն ասաց, որ կա վարկած, որ հենց կրիմինալի հետ է սա կապված, դրա համար ԱԱԾ-ի հետ են աշխատում. «Ուզում ենք հասկանալ՝ վերջնակետն ուր էր, ընդունենք, մի հանցավոր հեղինակություն պատվիրել էր, որ զենք, կամ փամփուշտ բերեն, չունենք այս պահին ավարտված գործ,որ կարողանամ միանշանակ պնդել ու ասել, որ այս նպատակով այսինչ սուբյեկտի համար բերում են»: Զենք բերողների քրեական անցյալ ունենալ-չունենալու հարցը ստուգվում է:
Հռիփսիմե ՋԵԲԵՋՅԱՆ
