Կեսգիշերից հետո ռազմական գործողությունները վերսկսվել են, ինչի հետեւանքով Շուշին եւ այլ խաղաղ բնակավայրեր ենթարկվել են հրետակոծության: Այսօր այս մասին Արցախի տեղեկատվական շտաբում կազմակերպված ասուլիսում ասաց Արցախի մարդու իրավունքների պաշտպան Արտակ Բեգլարյանը:
Նրա տեղեկացմամբ, կան տուժածներ եւ մեծ ծավալի ավերածություններ քաղաքացիական օբյեկտներում:
«Մարտունի քաղաքը նույնպես թիրախավորման տակ է եղել ադրբեջանական ուժերի կողմից, առկա են ավերածություններ քաղաքացիական օբյեկտներում, բայց, բարեբախտաբար, մարդկային կորուստ, վիրավոր չի արձանագրվել: Մի շարք գյուղական համայնքներ նույնպես թիրախավորվել են, բայց, բարեբախտաբար, մարդկային կորուստ չկա»,-ասաց Արցախի մարդու իրավունքների պաշտպանը:
Արտակ Բեգլարյանը ներկայացրեց իրավիճակը նաեւ Ստեփանակերտի հրթիռակոծությունից հետո, որը տեղի է ունեցել երեկ երեկոյան:
«Ծննդատան եւ շուկայի հարակից հատվածներում վիրավորվել է 2 քաղաքացիական անձ: Սա նշանակում է, որ ադրբեջանական զինված ուժերը շարունակում են դիտավորյալ թիրախավորել քաղաքացիական բնակչությանը եւ քաղաքացիական օբյեկտները՝ ի հեճուկս միջազգային մարդասիրական իրավունքի հանրահայտ սկզբունքների եւ նաեւ հոկտեմբերի 31-ին ԵԱՀԿ Մինսկի խմբի համանախագահների միջնորդությամբ հայտարարված համաձայնությանը, որ քաղաքացիական օբյեկտները չեն թիրախավորվելու: Սակայն սա հերթական ապացույցն է, որ ադրբեջանական կողմը չի պահում հատկապես՝ միջազգային իրավունքի կանոնները եւ նաեւ ուղղակի քաղաքական պայմանավորվածությունները՝ այդ թվում միջնորդների մասնակցությամբ»:
Ըստ Արտակ Բեգլարյանի, այդ հարձակումների մի մասը եղել է կասետային զինատեսակներով, որը միջազգային մարդասիրական եւ սովորութային իրավունքով արգելված զինատեսակ է, հատկապես՝ քաղաքացիական օբյեկտներում կիրառվելու պարագայում, քանի որ ունի բավականին լայնածավալ ազդեցության շրջանակ, ինչի հետեւանքով արձանագրվում են մեծ թվով կորուստներ. «Մեր կորուստների ու վիրավորների մի մասը հենց կասետային զինատեսակներով է արձանագրվել»:
Կարդացեք նաև
Այս ընթացքում առնվազն 46 քաղաքացիական անձ է զոհվել, 144 անձ էլ քաղաքացիական շրջանում վիրավորում է ստացել:
Այն բնակավայրերում էլ, որտեղ դիվերսիոն խմբեր են գործում, ըստ Արտակ Բեգլարյանի, հստակ տեղեկություն չունեն տուժածների մասին, քանի որ այնտեղ ռազմական գործողություններ են ընթանում:
Ընդհանուր առմամբ, վնասվել է 13 հազար 800 մասնավոր գույք, 3100 ենթակառուցվածքներ՝ էլեկտրամատակարարման կայաններ, կապի համակարգեր, ջրամատակարարման ու գազամատակարարման համակարգեր, կամուրջներ, մանկապարտեզներ, դպրոցներ, մշակութային կենտրոններ, Շուշիի եկեղեցին, հիվանդանոցներ եւ 2100 շարժական գույք:
Արտակ Բեգլարյանի տվյալներով, նոյեմբեր 2-ի դրությամբ 61 դպրոց է վնասվել, տասը մանկապարտեզ:
Լուսինե ԲՈՒԴԱՂՅԱՆ
