«Ի տարբերություն բնականոն իրավիճակի՝ հիմա անորոշության բարձր աստիճանում ենք: Այն, ինչ այսօր գնահատվում է վաղվա համար, վաղը կարող է արդիական չլինել, բայց ունենք խնդիր որեւէ պահի մեր պատկերացումն ամբողջացնելու, իհարկե՝ աչքներիս առաջ ունենալով ռիսկերը բյուջեի կատարման ընթացքում»,-ԱԺ պետաիրավական հարցերի եւ ֆինանսավարկային ու բյուջետային հարցերի հանձնաժողովների համատեղ նիստում այսօր 2021թ.-ի պետբյուջեի նախագծի քննարկման ժամանակ հայտարարեց ՀՀ ֆինանսների նախարար Ատոմ Ջանջուղազյանը:
Նա չբացառեց, որ հաջորդ տարի եւս բյուջեի նախագծի վերանայման կարիք կլինի. «Անորոշությունը՝ պայմանավորված համավարակով եւ պատերազմով, չի նվազում: Տարբերվող ցուցանիշները չեն բացառվում»:
«Իմ քայլի» պատգամավոր Արտակ Մանուկյանը նկատեց՝ ակնհայտ է, որ բյուջեի այս նախագիծը չի արտացոլում պատերազմով պայմանավորված ռիսկերը. «Ի՞նչն է խանգարում, որպեսզի այս ժամանակահատվածն ավելի մոտեցնենք ռազմական ռելսեր դնելու բյուջեին, որովհետեւ դա ուղերձի առումով էլ է կարեւոր: Ինչպես ասացիք, վերաբաշխումների շնորհիվ պաշտպանական բնագավառում հիմա շատ ավելի մեծ ծախս է իրականացվում, քան պլանավորված էր 2020թ. բյուջեով: Եկեք մի քայլ էլ մոտենանք իրականությանը, եւ եթե հետագայում անհրաժեշտ լինի փոփոխություն, կկարողանանք արագ հավաքվել ու քննարկել»:
Կարդացեք նաև
Ատոմ Ջանջուղազյանն արձագանքեց. «Կարծում եմ՝ չկա այդպիսի հնարավորություն, որովհետեւ անորոշության աստիճանի մասին խոսելիս մենք իրեն չենք նույնականացնում, մինչդեռ ձեր հարցը պարտավորեցնում է դա անել: Նախ, հենց պաշտպանության հետ կապված անորոշությունն է մեծ, այսինքն, այն իրողությունը, որը կա այսօր, վաղը կարող է դառնալ ոչ արդիական: Հետեւաբար, այսօր անորոշության նման պայմաններում չենք կարող կատարել այնպիսի փոփոխություն, որը կհամարենք բյուջեի տրամաբանության տեղափոխում պաշտպանական ռելսերի վրա: Առավել եւս, որ այնքան էլ որոշակի չի՝ պաշտպանական ռելսեր ասելով ի՞նչ նկատի ունենք. չափազանց հզոր տնտեսություն, որն իր կարիքները կբավարարի՞: Թե մեր ունեցած պայմաններում պաշտպանությանը հատկացվող չափերի վերանայում որպես կարճաժամկետ լուծում: Բացի այդ, վերանայումը միայն թվերով չէ, այլ քաղաքականության վերանայում էլ է ենթադրում: Հետեւաբար, մենք առայժմ չենք կարող պաշտպանության բնագավառի ծախսերի փոփոխության մասին խոսել»:
Արտակ Մանուկյանը նշեց. «2020թ.-ի մոդելում, բնականաբար, պատերազմական իրավիճակ պլանավորած չէր, բայց, այդուհանդերձ, գերակայությունների փոփոխությունը հնարավորություն է տվել, որ մենք մեկ ամսից ավելի բարձրացնենք ոլորտի պաշտպանունակությունը՝ սոցիալական կյանքի ապահովում եւ պաշտպանական բնագավառին միտված ծախսեր: Ենթադրենք, որ սա պրոյեկտում ենք նաեւ 2021թ.-ին՝ պատրաստվելով վատագույնին»:
Ատոմ Ջանջուղազյանը պատասխանեց. «Եթե տեխնիկական հնարավորության մասին է խոսքը, գործնականում ամեն ինչ էլ հնարավոր է: Տվեք ելակետային տվյալներ, եւ ցանկացած վարժություն հնարավոր է: Որ ասում եք՝ պրոյեկտենք, եկեք պրոյեկտենք. Դուք ասեք, թե մոտավոր ինչ տեւողությամբ եւ ուժգնությամբ ռազմական գործողություններ եք պատկերացնում 2021թ.-ին, եւ դա գնահատենք ու որոշումներ կայացնենք: Իսկ 2020թ.-ին մենք ծախսային քաղաքականություն չենք վերանայել: Ուղղակի վերանայել ենք առաջնահերթությունների իրականացումը: Առայժմ հնարավոր չի գնահատել, թե մյուս տարի որքան է տեւելու ազդեցությունն այս տարվա, հետեւաբար՝ այսօր չենք կարող հաջորդ տարվա համար վերանայումներ անել»:
Լուիզա ՍՈՒՔԻԱՍՅԱՆ
