Իսլանդիայի խորհրդարանի եւ Կենտրոնական կուսակցության անդամ Բիրգիր Թորարինսոնը, որը «Մեկ ազատ աշխարհ» (One Free World) միջազգային իրավապաշտպան կազմակերպության ղեկավար Մաջեդ Էլ Շաֆիի հետ միասին Արցախում է գտնվում, ասուլիսում նշեց, որ առաջին անգամ է Արցախում եւ որպես աստվածաբանություն ուսումնասիրած մարդ՝ մեծ պատիվ է համարում լինել այն երկրում, որի ժողովուրդն առաջինն է ընդունել քրիստոնեությունը՝ որպես պետական կրոն: Նա ասաց, որ իր աղոթքն է հղում այն մարդկանց համար, որոնք ստիպված են եղել տեղափոխվել ու կորուստներ կրել պատերազմի պատճառով:
Իսլանդիայի խորհրդարանի անդամն նշեց, որ ինքն ամենախաղաղասեր երկրից է՝ Իսլանդիան չունի բանակ եւ չի արտադրում որեւէ զինամթերք: «Իսլանդիան առաջին երկիրն է, որ ճանաչել է Էստոնիայի, Լիտվայի եւ Լատվիայի անկախությունը՝ ԽՍՀՄ-ի անկումից հետո, ինչպես նաեւ Խորվաթիայի, Հայաստանի, Ադրբեջանի, Վրաստանի անկախությունը: Առաջին երկիրն ենք, որը ճանաչել է Մոնտենեգրոյի անկախությունը, երբ այն անջատվել է Սերբիայից, մենք առաջին արեւմտյան երկիրն ենք, որը ճանաչեց նաեւ Պաղեստինի անկախությունը 2011թ»,-ասաց նա:
Բիրգիր Թորարինսոնը հայտնեց,որ տեսանյութեր են տեսել, թե ինչպես է ադրբեջանկան զինուժը ռազմական հանցագործություններ կատարում. «Տեսել ենք տեսանյութեր, որտեղ ակնհայտորեն երեւում է արգելված զենքերի օգտագործումը, վերջին արտադրության զինամթերքն օգտագործվում է Արցախի խաղաղ բնակչության դեմ, դուք կարող եք մահվան հանդիպել՝ պարզապես քայլելով փողոցում, ձեզ կարող է ուղղակի հարվածել ադրբեջանական անօդաչու թռչող սարքը, որ արտադրվում է Թուրքիայում եւ Իսրայելում… Իմ իսրայելցի գործընկերներին կոչ եմ անում դադարեցնել զենքի վաճառքը Ադրբեջանին: Թուրքիայի դերակատարությունն այս պատերազմում անընդունելի է բոլոր առումներով, հազարավոր վարձկանների ներգրավումը պատերազմի մեջ եւ Ադրբեջանի կողմից վարձատրումը՝ անընդունելի է միջազգային իրավունքի տեսանկյունից: Միջազգային հանրությունը, ցավոք, լռում է այս ամենի մասին»:
Իսլանդիայի խորհրդարանի անդամը հավելեց, որ պետք է լինել բավականաչափ հեռատես, որպեսզի կարողանալ լուծում տալ խնդրին: «Առաջին քայլը պետք է լինի խաղաղապահ զորքերի տեղակայումը, Մինսկի խումբը ցավոք, այդ առումով չի հասել հաջողության եւ դուք պետք է հարցնեք՝ ինչու: Միգուցե դա նրանից է, որ չկա բավականաչափ չեզոքություն եւ վստահություն: Իսլանդիան պատրաստ է օգնել բոլոր միջոցներով»,-ասաց Բիրգիր Թորարինսոնը:
Կարդացեք նաև
Գոհար ՀԱԿՈԲՅԱՆ
