Աշխարհահռչակ աստղերից շատ քչերը կարևորություն տվեցին այն իրադարձություններին, որոնք տեղի են ունենում արդեն մեկ ամսից ավելի Արցախում։ Սակայն կա մեկը, որը առանց որևէ կողմի ճնշման սկսեց խոսել իրականության մասին։
NBA-ի «Բոսթոն Սելթիքսում» հանդես եկող, ազգությամբ թուրք բասկետբոլիստ Էնես Կանտերը սեպտեմբերի 27-ից սկսած իր սոցիալական էջերում հետևորդներին է ներկայացնում, թե իրականում ով է մեղավոր այս կոնֆլիկտի համար։ Նա բացեիբաց մեղադրում է իր երկրի նախագահ Ռեջեփ Թայիփ Էրդողանին՝ անվանելով նրան «մեր օրերի Հիտլեր»։
Հոկտեմբերի 4-ին տեղադրելով տեսանյութ իր ինստագրամյան էջում՝ նա ներկայացրեց, թե Թուրքիայի բռնապետը ինչպիսի արարքներ է գործել վերջին տարիների ընթացքում տարածաշրջանում անկայունություն հաստատելու համար, որոնց մեջ էր մտնում, իհարկե, Լեռնային Ղարաբաղի կոնֆլիկտը։ Այդ տեսանյութը ցնցեց համացանցը և հավաքեց շուրջ 800.000 դիտում։
Կարդացեք նաև
Իսկ արդեն այս օրերին բասկետբոլիստը լուսանկար է տեղադրել իր սոցիալական էջում, նշելով, որ ոչ թե Թուրքիան է մեղավոր այս ամենի մեջ, այլ Էրդողանի ռեժիմը։ Այս տարվա NBA-ի կանոնավոր առաջնության մեկնարկից առաջ նա համալրեց «Բոսթոն Սելթիքսը» և իր շնորհանդեսի ժամանակ ներկայացավ Էրդողանին վիրավորող գրությամբ մարզաշապիկով։
Սակայն ատելությունը բասկետբոլիստի և նախագահի միջև գալիս է ավելի վաղ ժամանակներից։ Դեռևս 2016 թվականին Կանտերի պատճառով Էրդողանը ուղիղ հրաման է արձակում, որպեսզի ձերբակալեն Էնես Կանտերի հորը, քանի որ բասկետբոլիստը պաշտպանում էր հեղաշրջման փորձ կատարած մարդկանց կարծիքը, և ինչքան էլ Թուրքիայի կառավարությունը ստիպում էր հետ կանգնել նրան այդ մտքից, Կանտերը անվերապահորեն աջակցում էր նրանց։
Բասկետբոլիստի հայրը դրանից հետո հայտարարություն է տարածում, որ իր տղայի կարծիքը չի համընկնում Կանտերների ընտանիքի կարծիքի հետ, և նրանք հրաժարվում են իրենց զավակից։ Սակայն դա ևս որևէ ազդեցություն չի ունենում ո՛չ Էնես Կանտերի վրա և ոչ էլ Թուրքիայի կառավարության դիրքորոշման վրա։ Բասկետբոլիստի հորը դատապարտում են 15 տարվա ազատազրկման, իսկ նրան զրկում են անձնագրից։
Այս դեպքերից հետո Էնեսի մտքում հայրենիքի հետ կապում է միայն մեկ բան՝ ամեն ինչ անել, որպեսզի թուրք ժողովուրդը վերջապես ազատվի Ռեջեփ Թայիփ Էրդողանի դիկտատորական ռեժիմից։
Միքայել ՇԱԽՈՒԼՅԱՆ
Էնես Կանտերի լուսանկարը՝ Վիքիպեդիայից
