Սփյուռքահայերն այս օրերին բազմաթիվ ձևերով փորձում են աջակցել Հայաստանին և Արցախին՝ կազմակերպելով բողոքի ակցիաներ, դրահամավաքներ, ավտոերթեր և հումանիտար օգնություն։ Գերմանիայի Օլդենբուրգ քաղաքում բնակվող Հասմիկ Գզիրյանը «Հայերն այսօր»-ին պատմել է, որ պատերազմի մասին լուրը լսելուն պես որոշել է աջակցել հայրենիքին՝ թևնոցներ գործելով և վաճառելով։ Ստացված գումարը նվիրաբերելու է «Հայաստան» համահայկական հիմնադրամին։
«Պատեպատ էինք տալիս մեզ՝ ի՞նչ անենք, ու ծնվեց այս գաղափարը։ 20 թևնոց էի գործել, մտածեցի՝ եթե 20 հատը 2 եվրոյով վաճառվի, արդեն 40 եվրո կլինի, մեկ էլ տեսար՝ մի քիչ ավելի։ Ու ես չկարողացա ուղղակի աչքերիս հավատալ, թե ինչպես 60 պատվեր ունեցա։ Սկսեցի նստել ու արագ-արագ գործել, որովհետև հասկացա, որ այս 20 հատը շատ-շատ քիչ էր», – ասել է նա։
Պատվիրատուները ոչ միայն Գերմանիայից են, այլ նաև մյուս երկրներից։ Թևնոցները փաթեթավորվում են և փոստով հասնում հասցեատիրոջը։ Հասմիկն արդեն 500-ից ավելի պատվեր ունի։
Գերմանիայի մեկ այլ քաղաքում՝ Հանովերում էլ բնակվող Հասմիկ Թադևոսյանի տանը պատերազմի առաջին օրերից դաշնամուրի ստեղները չեն լռում։ Նպատակը մեկն է՝ դաշնամուրի դասեր անցկացնել և պարապմունքներից գոյացած ամբողջ գումարը մեկ տարի շարունակ ուղարկել համահայկական հիմնադրամին։
Կարդացեք նաև
«Ես գիտեմ, որ շատ-շատերն են և՛ սփյուռքից, և՛ Հայաստանից օգնում և գումար ուղարկում, բայց շատ կուզեի, որ դա չլիներ մեկանգամյա, երկանգամյա, այլ լիներ ինտենսիվ։ Բազմաթիվ արձագանքներ կան, խնդրանքներ՝ օնլայն պարապելու։ Տեսնենք՝ ինչպես կստացվի», – «Հայերն այսօր»-ին պատմել է նա։
Գերմանաբնակ հայուհիներն արդեն նոր գաղափարներ են մտածում Հայաստանին և Արցախին օգնելու համար՝ հավատով սպասելով, որ շուտով խաղաղություն կլինի։
ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի սփյուռքի բաժին
