Հոկտեմբերի 29-ին Բունդեսթագի Կանաչներ խմբակցության ԱլԳ երկրների հարցերով խոսնակ, Բունդեսթագի Արտաքին հարաբերությունների հանձնաժողովի անդամ Մանուել Զարացինը (Manuel Sarrazin) խմբակցության անունից հանդես է եկել հետևյալ հայտարարությամբ։
Լեռնային Ղարաբաղի շուրջ ռազմական էսկալացիայի և քաղաքացիական հաստատությունների թիրախավորման մասին պատմող զեկույցներն ընթերցելը ծանր է։ Անհրաժեշտ է անմիջապես դադարեցնել բռնությունը և պատերազմական հանցագործությունների մանրակրկիտ քննություն սկսել։ Հարավկովկասյան վիճելի տարածքի նկատմամբ Ադրբեջանի սանձազերծած հարձակումը հարցի լուծման չի հանգեցնի։
Կլինեն նոր տառապանքներ, գաղթ և արտաքսում, ինչը պետք է անհապաղ դադարեցնել։ Լեռնային Ղարաբաղը ռազմական ճանապարհով հետ գրավելու ցանկացած փորձ հանգեցնում է հումանիտար ճգնաժամի, որից պետք է անպայման խուսափել։ Խնդիրը չունի ռազմական լուծում։
Կայուն և տևական խաղաղության հնարավոր է հասնել միայն դիվանագիտական ճանապարհով։ Գերմանիան ԵԱՀԿ Մինսկի խմբի անդամ է և դրանով իսկ ավելին է, քան շաբաթներ շարունակ իր ստանձնած լուռ դիտորդի դերը։ Այն պետք է առավել ներգրավված լինի և բոլոր կողմերից պահանջի զերծ մնալ ուժի կիրառումից։
Կարդացեք նաև
Մի բան հստակ է. առանց թափանցիկության, տեղում կարիքավորներին օգնության և վստահության ձևավորման միջոցների տարածաշրջանում խաղաղություն հաստատվել չի կարող։ Այդ իսկ պատճառով պետք է պնդել, որ հակամարտող երկու կողմերն էլ համաձայնեն տեղում ԵԱՀԿ ընդարձակ ներկայությամբ հրադադարի վերահսկողության մեխանիզմներին։
Կա լուծում, որը հաշվի կառնի թե՛ Ադրբեջանի արդարացի շահը` միջազգային իրավունքի հիման վրա տարածքային ամբողջականության, թե՛ Լեռնային Ղարաբաղի բնակչության ինքնորոշման իրավունքը։ Նման լուծմանը և տարածաշրջանում մարդկանց խաղաղ համակեցության հասնելը հնարավոր է․ դա այն դեպքում, եթե տարածաշրջանը չմատնվի ուժի կենտրոններ Անկարայի և Մոսկվայի ցինիկ և ապակայունացնող ֆանտազիաներին։
