Գերմանիայի խորհրդարանի Ձախերի կուսակցության պատգամավոր Գրեգորի Գիզին Բունդեսթագում ելույթի ժամանակ արտգործնախարար Հայկո Մաասին կոչ է արել հրաժարվել ղարաբաղյան հակամարտության հարցում չեզոք դիրքորոշումից և հստակ տարբերակել գույները։
«Պարո՛ն նախարար, Ադրբեջանի ղեկավարը հայտարարել է, որ մինչև վերջ պատերազմ է տանելու, այսինքն՝ դեմ է գնալու Մադրիդյան սկզբունքներին և առաջ է մղելու ռազմական նվաճումներով հարցը լուծելու տարբերակը։ Այս իրավիճակում անհնար է չեզոք մնալ։ Թուրքիան ոչ միայն զենք է ուղարկում Ադրբեջանին, այլ նաև վարձկաններ, ինչը պետք է միանշանակ դատապարտվի»,- հայտարարել է պատգամավորը։
Նա հիշեցրել է, որ Գերմանիան ճանաչել է 1915թ․ Հայոց ցեղասպանությունը և դրանում կա Գերմանիայի մեղքի բաժինը, ուստի չպետք է թույլ տալ, որ պատմությունը կրկնվի։
«Այնպիսի մի պետություն, ինչպիսին Թուրքիան է, որն արդեն մեկ անգամ ցեղասպանություն է գործել հայերի նկատմամբ, պետք է էթիկայից ելնելով՝ առնվազն ձեռնպահ մնա Հայաստանի մասնակցությամբ հակամարտություններից և գոնե չմասնակցի ևս մեկ անգամ հայերին ոչնչացնելուն։
Կարդացեք նաև
Այստեղ չի կարելի չեզոք մնալ։ Քաղաքական լուծում գտնելու փորձերը Թուրքիայի և Ադրբեջանի կողմից տապալվել են։ Ես տեսել եմ հրապարակումներում, թե ինչպես են շղթայակապ երկու հայեր գնդակահարվում։ Սա ծանրագույն ռազմական հանցագործություն է, և անկախ իրավապաշտպան կազմակերպությունները հաստատել են տեսանյութերի իսկությունը։
Պարո՛ն նախարար, ո՛չ, Դուք չեք կարող չեզոք մնալ Կիպրոսի հարցում, չեք կարող չեզոք մնալ Ղարաբաղի հարցում։ Դուք պետք է հստակ տարբերակեք գույներն ու դատապարտեք Թուրքիայի սադրանքները։ Դադարեցրե՛ք զենքի մատակարարումները Թուրքիային։ Ես կարծում եմ, որ Թուրքիան պետք է վտարվի ԵԱՀԿ Մինսկի խմբից։ Նա այլևս այնտեղ անելիք չունի»,- ասել է Գրեգորի Գիզին։
Պատրաստեց Վիկտորյա ԱՆԴՐԵԱՍՅԱՆԸ
