Սպիտակի բժշկական կենտրոնում այսօր տեղի ունեցած պայթյունից տուժածներ չկան։Այս մասին Aravot.am-ին ասաց բ/կ տնօրեն Վարդուհի Սիսակյանը։
«Պայթյուն եղել է ձայնով, բայց արդյունքում ոչինչ չի վնասվել: Անսարքության խնդիր է, թթվածնի մատակարարման սարքը 24 ժամ աշխատում է, մենք երկու թթվածին ունենք՝ գազային եւ հեղուկ, այսինքն` թթվածնի մատակարարումը չի դադարել, գազայինը վերջացել է, ավտոմատ հեղուկին է անցել։
Բոլոր մասնագետներն այստեղ են, խնդիր չկա»,- ասաց տնօրենը։
Արփինե ՍԻՄՈՆՅԱՆ
«Առավոտ». Քիչ առաջ ԱԻՆ-ը տարածեց հետեւյալ հաղորդագրությունը. «Հոկտեմբերի 30-ին Ճգնաժամային կառավարման ազգային կենտրոն տեղեկություն է ստացվել, որ Լոռու մարզի Սպիտակ քաղաքի բժշկական կենտրոնում տեղի է ունեցել պայթյուն։
Դեպքի վայր է մեկնել ԱԻՆ ՓԾ մարզային փրկարարական վարչության օպերատիվ խումբը։
Պարզվել է, որ պայթյուն տեղի չի ունեցել, այլ վնասվել է թթվածնային բալոնի մատակարարման համակարգը։ Այլ գույքային վնասներ և տուժածներ չկան»:
Վարդուհի Սիսակյանի լուսանկարը՝ ֆեյսբուքյան էջից:
