ԵԽԽՎ Միգրացիայի, փախստականների և տեղահանվածների հարցերով հանձնաժողովը կոչ է անում դադարեցնել հրթիռային հարձակումները քաղաքացիական բնակչության դեմ։
«Քաղաքացիական օբյեկտներին հրթիռային հարվածները պետք է դադարեն։ Ադրբեջանի Բարդա քաղաքի վրա հարվածը ողբերգություն է ճիշտ այնպես, ինչպես և Լեռնային Ղարաբաղի Ստեփանակերտ քաղաքի ծննդատան և մյուս ենթակառուցվածքների վրա հարվածները։ Կողմերը կրում են պատասխանատվություն, կողմերը խնդրի մի մասն են, և կողմերը դրա լուծման մասն են»,- ասել է հանձնաժողովի նախագահ Պիեռ Ալան Ֆրիդեզը։
Նրա խոսքով՝ Լեռնային Ղարաբաղում հակամարտության մարդասիրական հետևանքները խորապես մտահոգիչ են։ «Իրավիճակը գնալով ավելի է վատանում, քանի որ մարտական գործողությունները չեն դադարում։ Իշխանությունները երկու կողմում էլ պետք է քայլեր ձեռնարկեն՝ հակամարտության հումանիտար հետևանքները նվազագույնի հասցնելու համար։ Իշխանությունները պետք է համագործակցեն համապատասխան հումանիտար կազմակերպությունների հետ»,- ասել է Պիեռ Ալան Ֆրիդեզը և հավելել, որ այդ հարցը ներառել է Միգրացիայի, փախստականների և տեղահանվածների հարցերով հանձնաժողովի օրակարգում, որպեսզի Եվրոպայի խորհրդի 47 անդամ պետություններն ուշադիր հետևեն իրավիճակին։
Պատրաստեց Վիկտորյա ԱՆԴՐԵԱՍՅԱՆԸ
