Ռուսաստանի Դաշնությունը խորապես մտահոգված է Լեռնային Ղարաբաղում ռազմական գործողություններով եւ մարտական գործողություններում Մերձավոր Արեւելքից վարձկանների ավելի լայնածավալ ներգրավմամբ։ Այս մասին հայտնել է ՌԴ ԱԳՆ խոսնակ Մարիա Զախարովան՝ այսօր հրավիրված ճեպազրույցում։
«Ցավոք, Լեռնային Ղարաբաղի հակամարտության գոտում իրավիճակը շարունակում է մնալ բարդ, եւ ռազմական դիմադրությունը պահպանվում է։ Այս պայմաններում լարվածության մեղմման եւ բանակցային գործընթաց սկսելու ուղղությամբ մենք ջանքեր ենք գործադրում ինչպես ազգային, այնպես էլ ԵԱՀԿ Մինսկի խմբի շրջանակներում»,-ասել է Զախարովան։
Նա նշել է, որ ՌԴ նախագահը մշտապես հեռախոսով շփվում է Հայաստանի եւ Ադրբեջանի ղեկավարների հետ, Լեռնային Ղարաբաղի իրավիճակի մասին Վլադիմիր Պուտինը խոսել է նաեւ Թուրքիայի նախագահի հետ, ՌԴ ԱԳ նախարար Սերգեյ Լավրովը քննարկել է խնդիրը Թուրքիայի արտգործնախարարի հետ, եւ Ֆրանսիայի արտգործնախարարի հետ։
Մարիա Զախարովան ասել է, որ հակամարտող կողմերի տնտեսությունների եւ հասարակությունների համար ծախսերը զգալիորեն աճել են․ «Մենք համոզված ենք, որ խնդրի խաղաղ կարգավորումն այլընտրանք չունի եւ անհրաժեշտ է բանակցությունները վերսկսել ԵԱՀԿ Մինսկի խմբի համանախագահության ջանքերի շրջանակներում։ Հոկտեմբերի 23-ին Վաշինգտոնում տեղի ունեցան Հայաստանի եւ Ադրբեջանի արտգործնախարարների հետ առանձին հանդիպումներ ԱՄՆ պետքարտուղարի եւ ԵԱՀԿ Մինսկի խմբի համանախագահների հետ: Կողմերը հաստատեցին հոկտեմբերի 26-ին ժամը 8: 00-ից մարդասիրական հրադադար վերսկսելու մտադրությունը: Ցավոք, համաշխարհային հանրության ջանքերը՝ դադարեցնել ռազմական գործողությունները՝ հաջողություն չունեցան»։
Կարդացեք նաև
Մարիա Զախարովան նշել է, որ հետագա քայլերը քննարկելու համար պայմանավորվածություն է ձեռք բերվել՝ վաղը, հոկտեմբերի 30-ին Ժնեւում հանդիպելու են Հայաստանի եւ Ադրբեջանի արտաքին գործերի գերատեսչությունների ղեկավարները՝ ԵԱՀԿ Մինսկի խմբի նախագահությամբ։
Պատրաստեց Նելլի ԲԱԲԱՅԱՆԸ
