Իրանը հանդես է եկել ղարաբաղյան հակամարտության կարգավորման նախաձեռնությամբ, որտեղ առաջատար դերը կստանձնեն տարածաշրջանի երկրները։ Այս մասին Մոսկվա ժամանելուց հետո հայտարարել է Իրանի փոխարտգործնախարար Աբաս Արաղչին։
«Մենք պատասխանատվություն ենք վերցնում և կարող ենք օգնել լուծել խնդիրը։ Իրանի առաջարկած սկզբունքի կարևոր առանձնահատկությունը տարածաշրջանային մոտեցումն է և դրա ռեալիզմը»,- ասել է դիվանագետը։
Փոխնախարարի խոսքով՝ իրենք առաջարկում են ճգնաժամի լուծման տարածաշրջանային մոտեցում՝ տարածաշրջանի բոլոր երկրների մասնակցությամբ, որոնք առանցքային դեր են խաղում, իսկ Ռուսաստանը տարածաշրջանում կարևոր երկրներից է։
«Իրանի պլանը առաջին փուլում նախատեսում է երկրների կողմից պահպանել որոշ սկզբունքներ, օրինակ, վերջ դնել օկուպացիային, հարգել տարածքային ամբողջականությունը, հարգել ինքնիշխանության և սահմանների անխախտելիության սկզբունքը, հումանիտար իրավունքներն ու փոքրամասնությունների իրավունքները, թույլ չտալ քաղաքացիական բնակչության և օբյեկտների վրա հարձակումները»,- ասել է Արաղչին։
Կարդացեք նաև
Նա նաև հավելել է, որ ԵԱՀԿ Մինսկի խումբը ցույց է տվել իր անկարողությունն ու անարդյունավետությունը ղարաբաղյան խնդրի լուծման հարցում։ «Արդեն 30 տարի է՝ Մինսկի խումբը ձևավորված է, սակայն չի կարողացել խնդրի երկարաժամկետ լուծում գտնել»,- հայտարարել է Իրանի փոխարտգործնախարարը։
Պատրաստեց Վիկտորյա ԱՆԴՐԵԱՍՅԱՆԸ
