Պատերազմական այս օրերին, անկախ մասնագիտությունից, ամեն ոք յուրովի կատարում է իր պարտքը՝ փորձելով ինչ-որ չափով օգտակար լինել։
Ինչպես 90-ականների արցախյան պատերազմի ժամանակ, այնպես էլ հիմա, պատերազմի թեժ կետերում են նաեւ արվեստագետները։
«Առավոտը» շարունակում է ներկայացնել ոչ միայն առաջնագծում կռվողներին, այլեւ թիկունքում ամեն կերպ ռազմաճակատին օգտակար գործունեություն ծավալող անհատ արվեստագետներին եւ մշակութային կոլետիվներին։
Ցավոք, պատերազմը բոլորին է թելադրում իր պայմանները։ Այդ առիթով կապվեցինք պետական մեկ-երկու մշակութային կոլեկտիվների լրատվական ծառայությունների հետ։
Հայաստանի ազգային ֆիլհարմոնիկ նվագախմբից հայտնեցին, որ նվագախմբի երաժիշտներն ու ողջ անձնակազմը հերթափոխով ռազմաճակատի համար այնքան անհրաժեշտ ցանցեր են գործում։ Այդ աշխատանքը ղեկավարում է ալտահարուհի Ժաննա Ափինյանը, որը պատերազմի առաջին օրերից մասնագիտացել է այդ գործում «Վոմա» մարտարվեստների դպրոցում։
Կարդացեք նաև
Ֆիլհարմոնիկի լրատվականից մեզ հայտնեցին, որ միայն Երեւանում, բացի «Արամ Խաչատրյան» համերգասրահից, գործում է քողարկող ցանցերի պատրաստման ավելի քան 20 կետ, որտեղ ընդգրկված են շուրջ 500 կամավորներ։ Իսկ նախաձեռնության հեղինակը մոսկվաբնակ մեր հայրենակից, մասնագիտությամբ իրավաբան, մանկավարժ Դավիթ Աղաջանյանն է։
Հայաստանի պարի պետական անսամբլից տեղեկացրին, որ օրերս երգիչ Ռուբեն Սասունցիի հետ ելույթ են ունեցել Արմավիրի զորամասերից մեկում եւ իրենց երգ ու պարով ոգեւորել ռազմաճակատ մեկնողներին։ Հավաստիացրին նաեւ, որ նման միջոցառումները շարունակական բնույթ կկրեն։ Մինչ այդ՝ պարի պետականը «Առնո Բաբաջանյան» համերգասրահում ելույթ է ունեցել Արցախից Երեւանում գտնվող կանանց եւ երեխաների համար։
Հայաստանի պարարվեստի պետական «Բարեկամություն» անսամբլից էլ ասացին, որ հոկտեմբերի 29-ին կմեկնեն քաղաք Արարատ՝ իրենց ելույթով քաջալերելու ռազմաճակատ մեկնող կամավորներին։ Նշեցին, որ հնարավորության դեպքում պատրաստ են իրենց արվեստով սատար կանգնել բոլորին։
Վերոնշյալ պետական մշակութային օջախների լրատվական ծառայությունները հավաստիացրին, որ լծված են ռազմաճակատին եւ Արցախի ժողովրդին անհրաժեշտ պարագաներով օգնելու գործին՝ ֆինանս, սնունդ, հագուստ, դեղորայք եւ այլն։
Գյումրիի Վարդան Աճեմյանի անվան պետական դրամատիկական թատրոնն էլ ակտիվ մասնակցություն ունենալով այս ամենին, հոբելյանական 155-րդ թատերաշրջանը օրերս բացեց Վարդան Պետրոսյանի՝ Հայոց ցեղասպանության պատմական դրվագների, Կոմիտասի դաժան կյանքի մասին մեկ անգամ եւս հիշեցնող «Վերելք» ներկայացմամբ, որը շեշտադրված զգուշացնում է չխաբվել թշնամու՝ իբր վերափոխված լինելուն եւ պայքարել մինչեւ վերջ։
Երկու օր Գյումրիում եւ երկու օր Երեւանում ներկայացված բեմադրության ողջ հասույթը փոխանցվելու է հայոց բանակին։ Ինչպես հայտնել էր Aravot.am-ը, ներկայացման մեջ ընդգրկված մի քանի դերասաններ ներկայացումից հետո շտապել են ռազմաճակատ՝ հաղթանակը մի քանի րոպե առաջ բերելու տրամադրվածությամբ։
Սամվել ԴԱՆԻԵԼՅԱՆ
«Առավոտ» օրաթերթ
28.10.2020
