ԱԺ արտահերթ նիստում այսօր երկրորդ ընթերցմամբ քննարկվեցին ռազմական դրությունից բխող երեք օրինագծեր, որոնք երեկ ընդունվել էին առաջին ընթերցմամբ: «Պաշտպանության մասին» օրենքում փոփոխությունների վերաբերյալ, ինչպես պաշտպանության փոխնախարար Գաբրիել Բալայանը զեկուցեց, մինչեւ այսօր առաջարկներ չեն եղել: Հիշեցնենք, որ այս օրինագծով սահմանվում է աշխարհազորի ստեղծումը. այն կազմավորվում է կամավորության սկզբունքով:
Երկրորդ՝ «Ռազմական դրության իրավական ռեժիմի մասին օրենքում փոփոխությունների» օրինագծով սահմանվում են ռազմական դրության պայմաններում ֆիզիկական եւ իրավաբանական անձանց գույքն ըստ անհրաժեշտության օգտագործելու առնչությամբ իրավահարաբերությունները, գույքի օգտագործման արդյունքում դրան հասցված վնասի դեպքում փոխհատուցման պայմանները: Այս օրինագծում, Բալայանի խոսքով, մինչեւ երկրորդ ընթերցումը փոփոխություններ չեն եղել:
Անփոփոխ է մնացել նաեւ երրորդ օրինագիծը՝ քրեական օրենսգրքում փոփոխությունների վերաբերյալ, որով նախատեսվում են առավել խիստ պատիժներ՝ օրենսգրքի 327-րդ, 327.1-րդ, 327.5-րդ, 327.6 -րդ, 328-րդ, 356-րդ, 361-րդ եւ 362-րդ հոդվածներով նախատեսված այն արարքների համար, որոնք կատարվել են ռազմական դրության, պատերազմի ժամանակ կամ մարտի պարագաներում:
Կարդացեք նաև
Լուիզա ՍՈՒՔԻԱՍՅԱՆ
