«Այս պահի դրությամբ ունենք երկու հարցաքննված ռազմագերի ադրբեջանական կողմից, որոնք պահվում են բոլոր միջազգային մարդասիրական իրավունքի նորմերի պահպանմամբ, ստանում են բարձրակարգ բժշկական օգնություն, երեքանգամյա սնունդ»,-մամուլի ասուլիսի ընթացքում տեղեկացրեց ՀՀ քննչական կոմիտեի Քրեագիտական վարչության պետ Ռաֆայել Վարդանյանը:
Նա նշեց, որ ադրբեջանցի ռազմագերիները նույնիսկ հարցաքննության ընթացքում ասել են, թե իրենք Ադրբեջանում դժվար թե ավելի լավ վերաբերմունքի արժանանային:
Խոսելով հայ ռազմագերիների մասին՝ նա հայտնեց. «Այս պահի դրությամբ ունենք 17 հայ զինծառայողներ, որոնք գտնվում են Ադրբեջանում՝ արդեն հաստատված տվյալներով, ևս երկուսի մասով տվյալները ճշտվում են»:
Կարդացեք նաև
Նա շեշտեց՝ Ադրբեջանում գերության մեջ գտնվող 17 անձինք զինծառայողներ են, հավելյալ տվյալներ ունենալու դեպքում անպայման կհաղորդեն: Հստակեցմանը՝ ադրբեջանական կողմից միայն երկո՞ւ ռազմագերի ունի հայկական կողմը՝ Ռաֆայել Վարդանյանը պատասխանեց. «Նրանք այն անձինք են, որոնք մասնակցել են հարցաքննություններին»:
Հիշեցմանը՝ ՀՀ ԱԱԾ տնօրենի տեղակալ Արմեն Աբազյանը հայտնեց՝ Ն.Մ-ն սեպտեմբերի 27-ից Արցախում և ՀՀ-ում հայտարարված ռազմական դրության պայմաններում մարտական հերթապահություն իրականացնող համածառայակիցների շրջանում տարածել է կեղծ ու ստահոդ լուրեր ՀՀ իշխանությունների կողմից հողերը հանձնելու վերաբերյալ և հարցին՝ դա եղել է պատվերո՞վ, պատվիրատուն հայտնի՞ է, Արմեն Աբազյանը պատասխանեց. «Այս պահի դրությամբ ունենք մեկ դեպք, որի հետ կապված որևէ մեկի կողմից պատվեր չի իրականացվել. անձն իր նախաձեռնությամբ է տարածել ապատեղեկատվություն»:
Հարցին՝ ի՞նչ վտանգ են ներկայացնում առաջնագծում արված նկարահանումները, որտեղ մտահոգություններ են հնչում տեխնիկայի, զենքի հետ կապված, կենցաղային պայմանների հետ կապված, Արմեն Աբազյանը պատասխանեց. «Բազմիցս հրապարակել ենք՝ ռազմական գործողությունների ժամանակ արգելվում է տեսանյութեր հրապարակելը, իսկ հրապարակողներն այս դեպքում մասնավոր դեպքեր են, որոնց նկատմամբ օրենքով սահմանված կարգով իրականացվում են համապատասխան աշխատանքներ»:
Տաթև ՀԱՐՈՒԹՅՈՒՆՅԱՆ
