Լեռնային Ղարաբաղի շուրջ բանակցություններում Թուրքիայի ներգրավման հարցում կարևոր է միայն պատերազմող կողմերի՝ Ադրբեջանի և Հայաստանի տեսակետը․ միայն նրանք կարող են համաձայնության գալ կամ ցանկանալ այս կամ այն պետության մասնակցությունը կարգավորման գործընթացին: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը՝ անդրադառնալով այն հարցին, թե Կրեմլում ի՞նչ են մտածում հայ-ադրբեջանական բանակցային գործընթացում Թուրքիայի հնարավոր մասնակցության վերաբերյալ։
«Այստեղ կարևոր է միայն երկու կողմերի տեսակետը։ Մենք նկատի ունենք հակամարտող երկրները, այսինքն՝ Ադրբեջանն ու Հայաստանը: Քանի որ միայն այդ երկու երկրները կարող են համաձայնվել կամ ցանկանալ այս կամ այն պետության մասնակցությունը կարգավորման գործընթացին»,- ասել է Պեսկովը։
Պատրաստեց ՎԻԿՏՈՐՅԱ ԱՆԴՐԵԱՍՅԱՆԸ
