«Այսօր պատերազմ ենք մղում, այդ պատերազմին մասնակցում են բոլորը՝ պետությունը, ազգաբնակչությունը, հայը: Մեզ համար տեսանելի այս պատերազմը ունի առնվազն երկու ճակատ՝ մեր երկրի սահմանների պաշտպանության, ինքնության պահպանման եւ գոյատեւման ճակատը եւ կորոնավիրուսային հիվանդության դեմ մղվող պայքարը: Վերջինիս գործընթացներում մենք ունենք նահանջ»,- Միասնական տեղեկատվական կենտրոնում կայացած ճեպազրույցի ժամանակ նշեց անեսթեզիոլոգ-ռեանիմատոլոգ Լիլիթ Մուսեյանը:
Նրա խոսքով. «Մեր հասարակության մի հատվածը դադարեցրել է պատշաճ կերպով պայքար մղել հիվանդության դեմ, դրանով իսկ ապարդյուն դարձնելով պայքարողների ջանքերը: Նվաճումների եւ վիրուսին նահանջել ստիպելու հարցում հարկ է, որ բոլորս համաձայնեցված եւ փոխօգնության մթնոլորտում գործենք: Չեմ կասկածում, թե կգտնվի գեթ մեկը, որը չի համաձայնի այն փաստի հետ, որ մեր ունեցած ողջ ներուժը եւ ծախսերն այսօր պետք է ուղղվեն ռազմի ճակատ»:
Լիլիթ Մուսեյանն ասաց, որ կորոնավիրուսը ոչ միայն հանգեցնում է պետության ծախսերի ավելացմանը, այլեւ պաշարում է առողջապահական ֆոնդը, զբաղեցնում է բուժաշխատողներին ոչ թե զենքից, այլ վիրուսից խոցվածներով: «Ի վերջո վարակը կարող ենք փոխանցել մեր սահմաններում մարտնչողներին: Պետք է որ առողջ լինեն մեր հայրենիքի պաշտպանները, մեր բուժաշխատողները…Պատահական չէ, որ թշնամին մեզ վրա հարձակվելու համար ընտրել է համաճարակային ժամանակաշրջանը՝ իրեն դաշնակից դարձնելով կորոնավարակը»,-ընդգծեց բժիշկը:
Կարդացեք նաև
Գոհար ՀԱԿՈԲՅԱՆ
