ՀՀ ԱԺ ֆինանսավարկային եւ բյուջետային հարցերի մշտական հանձնաժողովը հոկտեմբերի 23-ի հերթական նիստում քննարկել եւ դրական եզրակացություն է տվել հինգ համաձայնագրերի:
Քննարկված առաջին՝ «Հայաստանի Հանրապետության կառավարության եւ Ճապոնիայի կառավարության միջեւ «Տնտեսական եւ սոցիալական զարգացում» դրամաշնորհի տրամադրման համաձայնագիրը վավերացնելու մասին» օրենքի նախագիծը ստորագրվել է ընթացիկ տարվա հունիսի 30-ին: Համաձայնագիրը նպատակ ունի զարգացնել Ճապոնիայի հետ տնտեսական համագործակցությունը եւ խթանել Հայաստանի Հանրապետության տնտեսական եւ սոցիալական զարգացումը: Փաստաթղթի համաձայն՝ Ճապոնիայի կառավարությունը Հայաստանի կառավարությանը տրամադրելու է չորս հարյուր միլիոն ճապոնական յեն դրամաշնորհ, որի շրջանակում հայկական կողմը նպատակահարմար է համարել ձեռք բերել լիաքարշ (4WD) շտապ օգնության եւ «շարժական բժշկական կլինիկա» ավտոմեքենաներ, որոնք կօգտագործվեն Հայաստանի մարզերում, մասնավորապես` լեռնային շրջաններում՝ բնակչությանը բուժական օգնություն տրամադրելու նպատակով:
ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը քննարկման է ներկայացրել «Հայաստանի Հանրապետության եւ Վերակառուցման եւ զարգացման միջազգային բանկի միջեւ 2020 թվականի ապրիլի 21-ին ստորագրված «Սոցիալական ներդրումների եւ տեղական զարգացման ծրագրի համար լրացուցիչ ֆինանսավորումե վարկային համաձայնագիրը վավերացնելու մասին» համաձայնագիրը՝ նշելով, որ համաձայնագրի նպատակը համայնքների զարգացումն է: Փաստաթղթի համաձայն՝ ՎԶՄԲ-ը ՀՀ-ին տրամադրելու է 17.9 մլն եվրո գումարի չափով վարկ: Վարկի մարման ժամկետը 25.5 տարի է, որից արտոնյալ ժամկետը` 14.5 տարի է, տոկոսադրույքը լողացող է` 6-ամսյա EURIBOR + լողացող սպրեդ: Վարկի չմասհանված գումարի նկատմամբ հաշվարկվելու է պարտավորության վճար` տարեկան 0.25% դրույքաչափով: Նախատեսվում է նաեւ միանվագ կոմիսիոն վճար` վարկի գումարի 0.25%-ի չափով:
Քննարկվել է նաեւ «Հայաստանի Հանրապետության եւ Վերականգնման վարկերի բանկի միջեւ «Համայնքային ենթակառուցվածքների ծրագիր II, փուլ 3 – մասհանման ժամկետի երկարաձգում» նամակ-համաձայնագիրը վավերացնելու մասին» համաձայնագիրը, որով նախատեսված է 2 տարով՝ մինչեւ 2022 թ. դեկտեմբերի 30-ը, երկարացնել համաձայնագրի գործողության ժամկետը, ինչի հետեւանքով Հայաստանը պարտավորված կլինի վճարել ՎՎԲ-ի կողմից գնահատված երկարաձգման վճարի մի մասը՝ 960,000 եվրո, որը նախատեսված չէ 2020թ պետական բյուջեով:
Կարդացեք նաև
Հաջորդիվ քննարկվել է «Հայաստանի Հանրապետության եւ Վերականգնման վարկերի բանկի միջեւ 2020 թվականի հունիսի 22-ին ստորագրված «Գերմանական ֆինանսական համագործակցություն Հայաստանի Հանրապետության հետ. «Ջրային ռեսուրսների համալիր կառավարում/Ախուրյան գետ – փուլ 1» – մասհանման ժամկետի երկարաձգում» նամակ-համաձայնագիրը վավերացնելու մասին» օրենքի նախագիծը: Վաչե Տերտերյանի տեղեկացմամբ՝ ՀՀ կառավարության եւ Վերականգնման վարկերի (KfW) բանկի միջեւ 2020թ. հունիսի 22-ին ստորագրվել է «Գերմանական ֆինանսական համագործակցություն Հայաստանի Հանրապետության հետ. «Ջրային ռեսուրսների համալիր կառավարում/Ախուրյան գետ-փուլ 1» – մասհանման ժամկետի երկարաձգում» նամակ-համաձայնագիրը, որով նախատեսվում է ՀՀ եւ ՎՎԲ միջեւ 19.12.2014թ. ստորագրված «Ջրային ռեսուրսների համալիր կառավարում/Ախուրյան գետ – փուլ 1» վարկային համաձայնագրով սահմանված մասհանման վերջնաժամկետը երկարաձգել մինչեւ 30.06.2024թ.: Նշյալ երկարաձգման դեպքում Հայաստանը պարտավորված կլինի վճարել ՎՎԲ կողմից գնահատված երկարաձգման վճարի մի մասը, որը կազմում է 1.300.000 եվրո, որը նույնպես նախատեսված չէ ՀՀ 2020թ. պետական բյուջեով:
Հանձնաժողովը դրական եզրակացություն է տվել նաեւ «Հայաստանի Հանրապետության եւ Վերականգնման վարկերի բանկի միջեւ 2020 թվականի հուլիսի 1 -ին ստորագրված «Կովկասյան էլեկտրահաղորդման ցանց III (ծրագրի 2-րդ փուլ). Հայաստան-Վրաստան հաղորդիչ գիծ/ենթակայաններ» վարկային համաձայնագրի մասհանումների ժամկետի երկարաձգում եւ հետվճարման փոփոխված ժամանակացույց» նամակ-համաձայնագիրը վավերացնելու մասին» օրենքի նախագծին, որով նախատեսվում է համաձայնագրով սահմանված մասհանման վերջնաժամկետը երկարաձգել մինչեւ 31.12.2025թ.: Երկարաձգման դեպքում Հայաստանը պարտավորվում է վճարել ՎՎԲ-ի կողմից գնահատված երկարաձգման վճարի մի մասը, որը կազմում է 1.180.000 եվրո: Այս գումարը եւս նախատեսված չէ ՀՀ 2020 թվականի պետական բյուջեով:
ՀՀ Ազգային ժողով
