«Ես մեծ հույսեր չունեմ, որ Ադրբեջանում և Թուրքիայում կլինի ռազմական հանցագործների հաշվառում կամ հետաքննություն»,- Մարդու իրավունքների ուսումնասիրության ինստիտուտի՝ «Լեռնային Ղարաբաղի պատերազմի հետևանքները ԱՄՆ-ի և տարածաշրջանի համար» թեմայով կազմակերպած առցանց քննարկման ընթացքում ասաց Ամերիկայի հայկական համագումարի համանախագահ Վան Գրիգորյանը։
Նա կարծում է, որ Լեռնային Ղարաբաղի ներկայիս իրավիճակը թեստ է Միացյալ Նահանգների համար․ «Մենք գիտենք, որ վայրագությունների զոհերը հազվադեպ են արդարության հասնում։ Պետք է պարզ լինի, որ Ցեղասպանության հանցագործությունը կանխելու և դրա համար պատժի կոնվենցիան, ոչ միայն արգելում է ցեղասպանությունը, այլ նաև ցեղասպանության դավադրությունը և մեղսակցությունը»։
Վան Գրիգորյանը կեղծավոր անվանեց տարբեր երկրների և միջազգային կազմակերպությունների Հայաստանի և Ադրբեջանի միջև հավասարի նշան դնելու քաղաքականությունը, երբ կոնկրետ Ադրբեջանն է կատարում վայրագությունները, գլխատում հայերին, թիրախավորում քաղաքացիական բնակչությանը․ «Եվ երբ ԱՄՆ-ն կոչ է անում երկու կողմերին զսպվածություն ցուցաբերել, այդտեղ կեղծավորություն կա, որը լավ չի անդրադառնում Միացյալ Նահանգների կառավարության վրա, վախենում եմ, որ ի վերջո դա լավ չի անդրադառնա Միացյալ Նահանգների բնակիչների վրա։ Եվ դա մենք բոլորս պետք է լուրջ ընդունենք»։
Ամի ՉԻՉԱԿՅԱՆ
