«Քաղաքացիական պայմանագիր» կուսակցության կամավորական առաջին ջոկատը մեկնել է Հայաստանի հարավ-արեւելյան սահման: «Հրապարակի» տեղեկության համաձայն՝ «Նրանք Սյունիքում են, հավանաբար, վարժանքներ են անցնելու»:
«Քաղաքացիական պայմանագրի» 2016-ի ջոկատը
Հիշեցնենք, որ ՔՊ-ականները ջոկատ էին կազմել նաեւ 2016-ի ապրիլյան քառօրյա պատերազմի ժամանակ, սակայն ռազմական գործողություններին չմասնակցեցին:
Այս նոր կամավորական ջոկատի հրամանատարը «Իմ քայլը» խմբակցության քարտուղար Հակոբ Սիմիդյանն է։ ԱԺ կայքում հրապարակված նրա կենսագրականում տեղեկություն չկա զինծառայություն անցած լինելու մասին: Սակայն կա նշում, որ 2016-ին պարգեւատրվել է ՊՆ-ի «Գարեգին Նժդեհ» մեդալով:
Ջոկատում է փոխվարչապետ Տիգրան Ավինյանը: Կառավարության կայքում հրապարակված կենսագրականում դարձյալ որեւէ նշում չկա զինծառայություն անցած լինելու մասին, սակայն նշված է. «2016 թ. Պաշտպանության նախարարության կողմից պարգևատրվել է պատվոգրով՝ ապրիլ և մայիս ամիսներին Հայրենիքի սահմանների պաշտպանությանն ակտիվ մասնակցելու, առաջնագծում մարտական խնդիրները բարեխղճորեն կատարելու համար»:
Կարդացեք նաև
Զինծառայություն անցած լինելու մասին նշում չկա նաեւ կամավորական ջոկատի անդամ՝ Կրթության, գիտության, մշակույթի և սպորտի նախարար Արայիկ Հարությունյանի պարագայում: Նրա պաշտոնական կենսագրությունում մասնավորապես նշված է, որ «Բանակն իրականում» խմբի անդամ է, եւ «2007-2010թթ. ներգրավված է եղել հայ-թուրքական հաշտեցման երիտասարդական նախաձեռնություններում»:
Բարձր տեխնոլոգիական արդյունաբերության նախարար Հակոբ Արշակյանը նույնպես Արցախում է. այս մասին տեղեկանում ենք նրա ֆեյսբուքյան էջից: Նա լուսանկար է հրապարակել՝ մակագրելով. «Բերձորում տրամադրությունը հաղթական է»: Պաշտոնական կենսագրության համաձայն՝ Հակոբ Արշակյանը 2003 – 2005թթ. ծառայել է ՀՀ Զինված ուժերում: Ու նաեւ, որ 2016թ. Ապրիլյան պատերազմի ընթացքում ծառայել է առաջնագծում՝ «Քաղաքացիական պայմանագիր» կուսակցության կամավորական ջոկատի շարքերում:
Ջոկատի կազմում է «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲԸ–ի տնօրեն Վիլեն Գաբրիելյանը՝ ժամանակին հայտնի որպես «Նավակ ճոճող»: Նրա պաշտոնական կենսագրությունը կենտրոնի կայքում չկա, սակայն մամուլի հրապարակումներից հայտնի է, որ Վիլեն Գաբրիելյանը զինծառայություն անցել է, նաեւ ունի բուժծառայության լեյտենանտի կոչում:
Դառնանք ՔՊ կամավորական ջոկատի անդամ խորհրդարանականների մարտական փորձառությանը:
Ազգային ժողովի փոխնախագահ Ալեն Սիմոնյանը 2000-2002թթ. ծառայել է ՀՀ զինված ուժերում:
ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը 2012-2014թթ. ծառայել է ՀՀ զինված ուժերում:
Սյունիքի նախկին մարզպետ Կարեն Համբարձումյանը 2004-2006թթ. ծառայել է ՀՀ զինված ուժերում:
Պաշտպանության եւ անվտանգության հարցերի մշտական հանձնաժողովի անդամ Սիփան Փաշինյանը 2009-2011թթ. ծառայել է ՀՀ զինված ուժերում:
Տնտեսական հարցերի մշտական հանձնաժողովի անդամ Հայկ Գեւորգյանը 1985-1987թթ. ծառայել է ԽՍՀՄ զինված ուժերում:
Պետական-իրավական հարցերի մշտական հանձնաժողովի անդամ Վահագն Հովակիմյանը 1993-1995թթ. ծառայել է ՀՀ զինված ուժերում:
Հիշեցնենք, որ հոկտեմբերի 21-ին ՀՀ վարչապետ Նիկոլ Փաշինյանը կուսակցություններին, ՀԿ-ներին, քաղհասարակության ներկայացուցիչներին կոչ էր արել կամավորագրվել, զենք վերցնել ու գնալ ռազմաճակատ ու կանգնել հերոսների կողքին կամ նրանց տեղը եւ հասնել մեկ նպատակի՝ հաղթանակի:
Մինչ այդ կոչն արդեն՝ ՀՅԴ-ն հերթափոխով 4 կազմավորումներ ուղարկել էր ճակատ:
«Ադեկվադ» միաբանության կամավորները եւս ավելի վաղ են մեկնել ճակատ:
Կոչից հետո հայտնի դարձավ, որ «Հայրենիք» կուսակցությունն էլ է ջոկատ կազմավորել, որը ղեկավարելու է կուսակցության ղեկավար՝ ԱԱԾ նախկին պետ Արթուր Վանեցյանը:
Ջոկատ չկազմավորելու մասին հայտարարել է «Լուսավոր Հայաստան» կուսակցության նախագահ Էդմոն Մարուքյանը. «Առաջին օրվանից սկսած բոլորին թե՛ հրապարակային, թե՛ ոչ հրապարակային հորդորել եմ և հիմա էլ հորդորում եմ, որ ներկայանան համապատասխան զինկոմիսարիատներ ու զինվորագրվեն Հայոց Բանակին։ Սիրելի՛ կուսակցականներ և համակիրներ, մենք, որպես քաղաքական միավոր, զինված խումբ ձևավորելու նպատակ չունենք։ Մենք ունենք կայացած պետություն և համապատասխան պետական մարմիններ ու ընթացակարգեր. խնդրում եմ այլևս մի՛ դիմեք ինձ նման հարցով։ Սա կուսակցական հարց չէ. պատերազմը կուսակցություններ, թիմեր չի ճանաչում»:
