Ազգային ժողովի փոխնախագահ ՎԱՀԵ ԷՆՖԻԱՋՅԱՆԻ կարծիքով՝ Արցախյան հարցը ռազմական լուծում չի ունեցել, չունի ու չի էլ կարող ունենալ: Ըստ նրա՝ այն դիվանագիտական խողովակներով պետք է լուծել: «Իրատեսի» հետ զրույցում ԲՀԿ-ական պատգամավորը նշեց՝ ԵԱՀԿ Մինսկի խմբի համանախագահող երկրների գործոնն ու ներդրած ջանքերը մշտապես է կարևորել, բայց և զուգահեռաբար նշել՝ խնդրի կարգավորման բանալին Ռուսաստանի ձեռքում է:
Չստորադասելով որևէ այլ պետության հետ ունեցած կապերը՝ Ռուսաստանի Դաշնության հետ՝ որպես մեր հիմնական ռազմավարական գործընկերոջ, առավել քան ակտիվ պետք է փոխգործակցենք, այլ բանաձև պարզապես գոյություն չունի:
-Պարոն Էնֆիաջյան, Ձեր շեշտադրումը որքանո՞վ է տեղավորվում հատկապես վերջին տարիներին Հայաստանում տարվող հակառուսական ակտիվ քարոզչության մեջ։
-Հայաստանում գրասենյակներ ու մարդիկ կային ու կան, որ, այո, հակառուսական քարոզ են տարել ու տանում: Այսօր, իհարկե, նման հարցերով խորապես զբաղվելու, դրանք ուսումնասիրելու ու քննարկելու ժամանակը չէ, բայց պատասխաններ տալու ժամանակը գալու է:
-Մի քանի օր շարունակ վարչապետ Նիկոլ Փաշինյանը հանդիպումներ է ունենում արտախորհրդարանական ուժերի ներկայացուցիչների, Ազգային ժողովի խմբակցությունների, սեփական թիմակիցնեի հետ: Ի՞նչ եք կարծում, նա ՀՀ քաղաքացիների հե՞տ էլ կերկխոսի:
– Մեր երկրի հպարտ քաղաքացին, այո, պետք է տեղեկացված լինի ռազմաճակատում տիրող իրավիճակի ու գործողությունների մասին: Տեղեկացնողը պետք է վարչապետը լինի: Ազնիվ երկխոսություն պետք է տեղի ունենա, հիմա առավել քան հասունացել է այդ պահը:
Կարդացեք նաև
-Պատերազմի ավարտից հետո միջազգային կառույցների հետ հարաբերությունները հստակեցնելու խնդիր պե՞տք է դնել արդյոք:
-Միջազգային կառույցների մտահոգությունները, գնահատականներն արդեն սպառել են իրենց: Ադրբեջանն այն երկիրը չէ, որ ականջալուր լինի միջազգային տարբեր կառույցների կոչ-հորդորներին կամ հետևություններ անի դրանցից: Հայտարարություններին պետք է հստակ գործողություններ հետևեն: Թե չէ՝ այդ մտահոգությունների ներքո 100 տարի առաջ ցեղասպանություն է եղել: Այժմ չպետք է թողնել, որ նույն բանը կրկնվի:
Զրույցը՝ Սևակ ՎԱՐԴՈՒՄՅԱՆԻ
Հոդվածն ամբողջությամբ՝ «Իրատես» թերթի այսօրվա համարում:
