«Ամոթ, ամոթ», «Ղրիմը Ռուսաստան է և վերջ», «Ղրիմը Ռուսաստան է և վերջ»,-ՀՀ-ում Ուկրաինայի դեսպանատան առաջ այսպիսի կոչեր հնչեցրին ՀՀ տասնյակ քաղաքացիներ: Նրանք իրենց բողոքի ձայնը բարձրացրին՝ դատապարտելով Ուկրաինայի վարած քաղաքականությունը:
Ցուցարարները կոչ արեցին Ուկրաինայի դեսպանին պատասխան տալ, թե ինչու է Ուկրաինան նման քաղաքականություն վարում: Նրանք հարցնում էին. «Մենք ուզում ենք հասկանալ՝ ինչո՞վ է պայմանավորված Ուկրաինայի նախագահի՝ այս օրերին Էրդողանին պարգևատրումը: Դա արդյոք մարտահրավե՞ր չէ հայկական կողմին, որ դուք հրապարակավ պաշտպանում եք Թուրքիայի վարած քաղաքականությունը: Խնդրում ենք մեզ տալ այս հարցերի պատասխանները: Սոցցանցերում քիչ չեն հնչում հայտարարություններ, որ Ղրիմը Ռուսաստան է և վերջ: Եթե դուք այդպես եք վարվում, ուրեմն Ղրիմը Ռուսաստան է և վերջ»:
Ցուցարարները գոչում էին՝ դուրս եկեք, դուրս եկեք: Քիչ անց նրանց հետ հանդիպման դուրս եկավ ՀՀ-ում Ուկրաինայի փոխդեսպան Դենիս Ավտոնոմովը:
Մինչ ցուցարարների հետ զրուցելը նա հայտարարեց. «Մենք ողջունում ենք ձեզ Ուկրաինայի դեսպանատան առաջ: Ուզում եմ հիշեցնել, որ հայ-ուկրաինական հարաբերությունները եղել են դարերով, Ուկրաինայում ապրում է հայկական ամենամեծ համայնքներից մեկը: Մեզ համար ձեր ցավը հասկանալի է: Ուկրաինան տարիներ շարունակ ապրում էր պատերազմի և ագրեսիայի մեջ: Մեզ համար պատերազմի ցավը հասկանալի է: Դուք շատ լավ գիտեք, չեմ ուզում ասել այն երկրի մասին, որը ագրեսիա է իրականացնում Ուկրաինայի դեմ: Հիմա արդեն կարող եմ ձեզ լսել»:
Կարդացեք նաև
Փոխդեսպանն ասաց՝ եթե ցանկանում են, կարող են ռուսերեն խոսել, եթե ոչ՝ կարող է հրավիրել թարգմանչի: Ցուցարարները ցանկացան Հայաստանում հայերեն խոսել և խնդրեցին թարգմանիչ հրավիրել:
Նրանք հարցրին՝ ինչո՞ւ է Ուկրաինայի նախագահը պարգևատրում ագրեսոր երկրի նախագահին: Փոխդեսպանը պատասխանեց. «Ցանկացած երկրի արտաքին քաղաքականություն ունի երկու բաղադրիչ՝ ազգային շահ, երկկողմ հարաբերություններ: Հայաստանը կառուցում է իր հարաբերություններն այնպես, ինչպես ճիշտ է համարում: Ռուսաստանն ագրեսոր և օկուպանտ է Ուկրաինայի համար: Ցանկացած երկիր իր արտաքին քաղաքականությունը կառուցում է այնպես, ինչպես համարում է ճիշտ»:
Տաթև ՀԱՐՈՒԹՅՈՒՆՅԱՆ
