2016թ.-ին ՀՀ ոստիկանության ՊՊԾ գունդը գրաված եւ մի շարք ծանր հանցագործությունների կատարման համար մեղադրվող «Սասնա ծռեր» խմբի անդամների (Պավլիկ Մանուկյան, Վարուժան Ավետիսյան եւ այլք…) գործով (նախագահող դատավոր Մեսրոպ Մակյան) հոկտեմբերի 21-ի դատական նիստը հետաձգվեց՝ կալանքի տակ գտնվող ամբաստանյալների՝ դատարան չտեղափոխելու պատճառաբանությամբ:
Նախագահող դատավորը տեղեկացրեց՝ ոստիկանական ուժերի վերաբաշխման պատճառով ոչ միայն այս գործով, այլ իր վարույթում գտնվող տարբեր գործերով կալանավորներին դատարան չեն տեղափոխում:
Պավել Մանուկյանի ներկայացուցիչ Զարուհի Փոստանջյանը միջնորդություն ներկայացրեց՝ իր պաշտպանյալի մասով գործն առանձնացվի և դատաքննությունը շարունակվի՝ պատճառաբանելով, որ երկարատև պատերազմի շրջան ենք մտել:
Ամբաստանյալ Վարուժան Ավետիսյանը հայտարարեց՝ եթե հնարավոր է ընթացակարգ կիրառել, որ խափանման միջոցի հարցով նիստ լինի, դա նպատակահարմար է համարում, եթե ոչ, ապա մինչև ռազմական գործողությունները չավարտվեն, չեն կարող նիստ անել:
Կարդացեք նաև
Նախագահող դատավորը որոշեց գործի քննությունը հետաձգել երեք շաբաթով: Հաջորդ դատական նիստը նշանակվեց նոյեմբերի 11-ին ժամը 11-ին:
Տաթև ՀԱՐՈՒԹՅՈՒՆՅԱՆ
