Այսօր ԱԺ-ում լրագրողների հետ զրույցում «Լուսավոր Հայաստան» խմբակցության ղեկավար Էդմոն Մարուքյանը խոսեց դիվանագիտական բացթողումների, միջազգային հանրության արձագանքի մասին. «Օրինակ, ԵՄ-ի հայտարարությունը եղավ՝ կապված Գյանջայի հարվածի հետ, բայց մինչ այդ Ստեփանակերտը, այլ խաղաղ քաղաքներ ռմբակոծվում էին՝ միջազգային հումանիտար իրավունքի բոլոր խախտումներով, կասետային ռումբերով: Այդ ամեն ինչը լուսաբանել ենք, նկարել ենք, ուղարկել ենք ուր ասես, ոչ մի հայտարարություն այդ մասով չի եղել ու եղել է հայտարարություն Գյանջայի հետ կապված: Դա նշանակում է, որ մեր դիվանագիտությունը այստեղ բան ունի անելու ու այդ բացթողումը պետք է վերականգնել: Որովհետեւ եթե ոչ մի բան չի արվում Ստեփանակերտի մասով, ուրեմն չպետք է արվի նաեւ Գյանջայի մասով: Բայց պարզվեց ընդհակառակը, արձագանք եղավ էս կողմից:
Մեր պրոակտիվ աշխատանքն է պետք: Մեր դիվանագիտությունը մինչ այսօր եղել է ռեակտիվ, այսինքն, մենք սպասում ենք մի բան լինի, մենք գնան արձագանքենք, չենք նախաձեռնում, մինչդեռ պետք է մենք նախաձեռնենք այդ ամեն ինչը, չնայած խորհրդարանական դիվանագիտության մասով ինչ պետք է՝ արել ենք: Հիմա թե ինչ եղավ, որ Գյանջայում հայտարարություն եղավ, այստեղ չեղավ, մեր մեջ պետք է փնտրենք մեղքը, պետք է ուրեմն լավ աշխատենք, այդքան բան:
Այդտեղ մի դրվագ կա, որ մեր հանրությունը չգիտի: Իրենք բոլոր դեսպաններին հավաքում են մի հատ ավտոբուսի մեջ, տանում են այդ ռմբակոծված վայրում իջեցնում են: Մենք էլ ասում ենք՝ բա ինչի՞ այստեղի դեսպանները չեն գնում Ստեփանակերտ, մենք մեր ժողովրդին այդ մասը չենք բացատրում, որ այստեղ հավատարմագրված դեսպաններն իրավունք չունեն այցելելու Արցախ, իսկ այնտեղ գտնվում են երկրի ներսում, հետեւաբար սահմանափակումներ, բարդություններ կան այդ մարդուն տանել դեպքի վայրում կանգնացնել: Բայց դե տեսանյութերով, վիրավորներով, վերջին հաշվով ֆրանսիացի լրագրողի վիրավորվելով, ՌԴ-ի լրագրողի վիրավորվելով միջազգային հանրությունը տեղեկացված է, որ խաղաղ բնակչությունը ռմբակոծվում է, պարտադիր չի դեսպանները գային գլխին կանգնեին»:
Հռիփսիմե ՋԵԲԵՋՅԱՆ
