ՄԱԿ Անվտանգության խորհուրդը երեկ գիշեր քննարկել է Լեռնային Ղարաբաղում հրադադարի ռեժիմի վերահսկողությունը ապահովելու անհրաժեշտությունը: Այս մասին երկուշաբթի՝ Լեռնային Ղարաբաղի հարցով փակ հանդիպման ավարտին, լրագրողներին ասել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան։
«Այժմ անհրաժեշտ է պահպանել հրադադարի ռեժիմը․ սա ամենահրատապ խնդիրն է, քանի որ համաձայնությունը ձեռք է բերվել, բայց չի իրականացվել»,- ասել է նա:
«Հիմնական հարցն այն է, թե ինչպես ապահովել հրադադարի պահպանման վերահսկողությունը։ Այս հարցը, իհարկե, քննարկվել է խորհրդակցությունների ընթացքում, և Անվտանգության խորհուրդը բավականին միասնական է իր մոտեցումներում»,- ասել է ՄԱԿ-ում ՌԴ մշտական ներկայացուցիչը:
Միևնույն ժամանակ, նա պարզաբանել է, որ ՄԱԿ դիտորդական առաքելություն տարածաշրջան ուղարկելը Անվտանգության խորհրդի կողմից հատուկ մանդատ է պահանջում։
Կարդացեք նաև
«Սա արագ գործընթաց չէ։ Տեղեկություններ կան, որ Ռուսաստանի պաշտպանության նախարարը Հայաստանի և Ադրբեջանի ռազմական գերատեսչությունների ղեկավարների հետ քննարկել է այդ հարցը, թե ինչպես կարող է իրականացվել այդ վերահսկողությունը», – ասել է Նեբենզյան:
Դիվանագետը չի բացառել, որ ԵԱՀԿ-ն կարող է իր վրա վերցնել մշտադիտարկման առաքելությունը, հատկապես, որ այդ կազմակերպությունը զբաղվում է հակամարտության կարգավորմամբ։ «Ով և ինչ կարգավիճակով կլինի այնտեղ՝ դեռ հարց է, որը քննարկվում է», – հավելել է ՄԱԿ-ում ՌԴ ներկայացուցիչը։
Պատրաստեց Վիկտորյա ԱՆԴՐԵԱՍՅԱՆԸ
