«Հայաստանում ԱՄՆ դեսպանատան քաղաքական եւ տնտեսական հարցերով պատասխանատուն ասաց՝ մենք գիտենք, մենք ամեն ինչից տեղյակ ենք: Գիտեին, որ Ադրբեջանի կողմից կան Թուրքիայի կողմից ուղարկված վարձու ահաբեկիչներ: Ասացին՝ տեղյակ են, բայց իրենց երկրի ղեկավարի անունից որեւէ արձագանք հնչեցնել չեն կարող»,-այսօր լրագրողների հետ զրույցում ասաց Արմինե Մելքոնյանը՝ նշյալ պաշտոնյանի հետ հանդիպումից հետո:
Մի խումբ քաղաքացիներ, հասարակական գործիչներ Երեւանում ԱՄՆ դեսպանատան դիմաց բողոքի ցույց էին կազմակերպել՝ պահանջելով դատապարտել ընդդեմ Արցախի ադրբեջանա-թուրքական ագրեսիան: Դեսպանատան քաղաքական եւ տնտեսական հարցերով պատասխանատուն խոստացել է ցուցարարների պահանջների հիման վրա համառոտ զեկույց կազմել եւ ուղարկել Վաշինգտոն՝ ներկայացնելով Արցախում, Հայաստանում տիրող իրադրությունը: Արմինե Մելքոյանն ասաց, որ դեսպանատան պաշտոնյան ողջունել է նաեւ, որ Հայաստանում կարող են այսպես խաղաղ ձեւով հարցի լուծում պահանջել:
«Եվս մեկ անգամ պետական մակարդակով հաստատվեց, որ ԱՄՆ-ն ընդունում է, որ այս պատերազմին միացել են նաեւ ահաբեկիչներ»,- նշեց Արսեն Վարդանյանը, որը նույնպես դեսպանատան պաշտոնյայի հետ հանդիպում ունեցած քաղաքացիների թվում էր: Դեսպանատան պաշտոնյան նշել է, որ իրենք անմիջական կապի մեջ են Արցախի մարդու իրավունքների պաշտպանի, ԱԳՆ-ի հետ, եւ պարբերաբար տեղեկատվություն են ուղարկում Վաշինգտոն:
Բողոքի ցույցի մասնակից Անահիտ Բախշյանը հիշեցրեց, որ այդ ահաբեկիչները նույն ահաբեկիչներն են, որոնք Նյու Յորքում 2001-ի սեպտեմբերի 11-ին իրականացրել էին ահաբեկչություն:
Կարդացեք նաև
«Մենք մեզ պաշտպանելու համար ենք կռվում, որովհետեւ ռումբերը թափվում են Ստեփանակերտի, Հադրութի, Շուշիի վրա: Խոսեցինք նաեւ այն մասին, որ Գյանջայի օդանավակայանը պայթեցվել է մեզ պաշտպանելու համար, քանի որ այնտեղից ռումբերը թափվում էին Արցախի վրա: Տարբեր քաղաքացիական ենթակառուցվածքներ՝ դպրոցներ, մանկապարտեզներ ավերվել են»,-ասաց տիկին Բախշյանը:
Ցույցի մասնակիցները նշել են, որ սպասում են կոնկրետ գործողությունների:
Լուսանկարները՝ Արմինե Մելքոնյանի ֆեյսբուքյան էջից:
Լուսինե ԲՈՒԴԱՂՅԱՆ
